དཔལ་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་མཆོག་ལ་ས་སྐྱ་པ་ལྷ་སྡེ་མི་སྡེ་ཡོངས་ནས་བརྟན་བཞུགས་བསྟར་འབུལ།

2023.12.27
དཔལ་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་མཆོག་ལ་ས་སྐྱ་པ་ལྷ་སྡེ་མི་སྡེ་ཡོངས་ནས་བརྟན་བཞུགས་བསྟར་འབུལ།
དཔལ་ས་སྐྱའི་སྨོན་ལམ་ཆེན་མོའི་དྲྭ་ཚིགས།

ཟླ་བ་འདིའི་ཕྱི་ཚེས་༢༥ཉིན་དབུ་བཙུགས་ཀྱིས་ཉིན་བཅུའི་རིང་གནས་མཆོག་རྡོ་རྗེ་གདན་གྱི་བྱང་ཆུབ་ཤིང་དྲུང་དུ་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཐེངས་༣༢ འཚོགས་བཞིན་པ་དང་བསྟུན་ནས་ལོ་ལྟར་ནང་བཞིན་འདི་ལོ་ཟླ་བ་འདིའི་ཕྱི་ཚེས་༢༧ཉིན་སྨོན་ལམ་ཚོགས་ཆུང་ནས་ས་སྐྱ་པ་ཡོངས་ཀྱི་ཚབ་ཞུས་ཏེ་དཔལ་༸ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་བསྟན་པ་དང་འགྲོ་བའི་དོན་དུ་སྐུ་ཚེ་ཞབས་པད་བརྟན་པའི་བརྟན་བཞུགས་བསྟར་འབུལ་ཞུས་གནང་མཛད་སོང་། དེའི་སྐོར་ས་སྐྱ་སྨོན་ལམ་ཚོགས་པའི་དྲུང་ཆེ་རྒན་བསོད་ནམས་རིན་ཆེན་ལགས་ཀྱི་འདི་ག་རླུང་འཕྲིན་ཁང་ངོ་སྤྲོད་གནང་སྐབས། ད་ལན་༸གོང་མ་ཁྲི་ཆེན་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་པའི་ལྷན་ཚོགས་དེའི་ཐོག་ས་སྐྱ་༸གོང་མ་ཁྲི་འཛིན་༤༣པ་དབུས་པའི་རྒྱ་བལ་ཡུལ་འབྲུག་གསུམ་གྱི་ནང་ཡོད་པའི་ས་སྐྱའི་དགོན་ཁག་༤༧གྱི་བླ་སྤྲུལ་དང་མཁན་པོ། གཞན་ཡང་དད་ལྡན་སེར་སྐྱ་མི་མང་བཅས་ཁྱོན་མི་གྲངས་སྟོང་ཕྲག་བརྒྱད་དགུ་ཡས་མས་ཞིག་ལྷན་འཛོམས་ཀྱི་ཐོག་གནས་བརྟན་ཕྱག་མཆོད་ཀྱི་སྒོ་ནས་བརྟན་བཞུགས་བསྟར་འབུལ་ཞུས་སྐོར་གསུངས་ཡོད། ཡང་སྐབས་དེར་སུད་སི་ནས་ཕེབས་པ་བསོད་ནམས་སྟོབས་རྒྱས་ལགས་ཀྱིས་གསུང་ན། བསྟན་པ་རྒྱས་པ་དང་། དེ་བཞིན་བོད་དོན་བདེན་མཐའ་སེལ་ཐབས་སོགས་ཀྱི་ཆེད་དམིགས་ཏེ་བླ་མ་སྐུ་ཚེ་བརྟན་རྒྱུ་གལ་ཆེན་པོ་ཡིན་པའི་དགོངས་ཚུལ་གསུང་གནང་བྱུང་། དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་དེ་ནི་གཙོ་བོ་འཛམ་གླིང་ནས་ནད་མུག་འཁྲུག་རྩོད་ཞི་བ་དང་འཕྲལ་ཡུན་རེ་འབྲས་གེགས་མེད་ཆོས་བཞིན་སྒྲུབ་རྒྱུ་སོགས་ལ་ཆེད་དམིགས་ཏེ་འཚོགས་གནང་གི་ཡོད་པ་རེད་འདུག དེ་མིན་གནས་མཆོག་རྡོ་རྗེ་གདན་དུ་དགུན་དུས་སུ་ཆོས་རྒྱུད་ཁག་གི་སྨོན་ལམ་ཚོགས་བཞིན་ཡོད་པ་ལྟར་འདི་ཚེས་༢༦ནས་དབུ་བཙུགས་ཀྱིས་དགེ་ལྡན་ཆོས་འཕྲུལ་སྨོན་ལམ་ཆེན་མོ་ཉིན་དྲུག་གི་རིང་འཚོགས་བཞིན་ཡོད་པ་རེད།།

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། པ་སངས་དོན་ལྡན།

བལྟ་བཤེར་མང་ཤོས་བྱས་པའི་གནས་ཚུལ།
RFA
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིར་༧ཞབས་སོར་བདེ་བར་འཁོད་སོང་།
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
༸གོང་ས་མཆོག་གིས་ནྰ་ལནྡྰ་གཙུག་ལག་སློབ་གཉེར་ཁང་གསར་པ་དབུ་འབྱེད་གནང་བར་འཚམས་འདྲི་མཛད་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎