སྲིད་སྐྱོང་དང་ཚོཊ་གཙོ་རྣམ་གཉིས་ཀྱིས་རྒྱ་གར་གྱི་སྲིད་འཛིན་གཞོན་པར་འཚམས་འདྲི།

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་རྣམ་གཉིས་ཀྱིས་རྒྱ་གར་གྱི་སྲིད་འཛིན་གཞོན་པར་གསར་འདེམས་བྱུང་བར་འཚམས་འདྲི་བཀྲ་ཤིས་བདེ་ལེགས་ཞུས་འདུག
དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྤྱི་ཚེས་༧་ཉིན་སྐུ་ཞབས་Shri Venkaiah Naidu་མཆོག་རྒྱ་གར་གྱི་སྲིད་འཛིན་གཞོན་པར་འོས་འདེམས་བྱུང་བར་འཚམས་འདྲི་བཀྲ་ཤིས་བདེ་ལེགས་ཞུས་འདུག
སྲིད་སྐྱོང་མཆོག་གིས་ངོས་ཀྱིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྐུ་ཉིད་མཆོག་རྒྱ་གར་གྱི་སྲིད་འཛིན་གཞོན་པར་འོས་འདེམས་བྱུང་བར་སྙིང་ཐག་པ་ནས་དགའ་བསུའི་འཚམས་འདྲི་ཞུ་རྒྱུ་ཡིན། རྒྱ་གར་གྱི་སྲིད་འཛིན་གཞོན་པ་ནི་ཁྲིམས་ལུགས་ལྟར་རང་བཞིན་གྱི་གྲོས་ཚོགས་གོང་མའི་ཚོགས་གཙོ་ཡིན་པ་དང་། གྲོས་ཚོགས་གོང་མ་ནི་ཁྲིམས་ལུགས་གཏན་འབེབས་གནང་རྒྱུའི་ལས་དོན་ཐོག་ཐུགས་འཁུར་ཆེན་པོ་བཞེས་མཁན་ཞིག་ཡིན་ཞིང་། ལྷག་པར་འདས་པའི་ལོ་གསུམ་ནང་གྲོས་ཚོགས་གོང་མས་ཁྲིམས་ལུགས་གཏན་འབེབས་དང་འབྲེལ་བའི་རྒྱ་གར་ཆབ་སྲིད་ཀྱི་ལས་དོན་གལ་གནད་ཆེ་བ་མང་པོ་ཞིག་ཐག་གཅོད་གནང་རྒྱུ་དང་འབྲེལ་བའི་ལས་དོན་ཐོག་དམིགས་བསལ་དོ་ཁུར་ཆེ་བཞེས་གནང་དང་གནང་མུས་ཡིན་སྟབས་སྐུ་ཉིད་མཆོག་གི་ལས་འགན་དེ་དེ་བས་གལ་གནད་ཧ་ཅང་ཆེན་པོ་ཞིག་ཆགས་ཡོད་ཅེས་གསུངས་འདུག
ཡང་སྲིད་སྐྱོང་མཆོག་གིས་སྐུ་ཉིད་མཆོག་ནི་ཉམས་མྱོང་ལྡན་པའི་ཆབ་སྲིད་མི་སྣ་ཞིག་དང་ཡུན་རིང་ནས་མང་ཚོགས་ཀྱི་བདེ་དོན་ཆེད་ཞབས་ཞུ་བསྒྲུབས་མྱོང་མཁན་ཞིག་ཡིན་སྟབས། གྲོས་ཚོགས་དང་འཛིན་སྐྱོང་བཀའ་ཤག་བར་ལྗིད་མཉམ་སྟངས་འཛིན་གང་ལེགས་གནང་བ་བརྒྱུད་མང་གཙོའི་ལམ་བཟང་སྲུང་སྐྱོང་གནང་ཐུབ་རྒྱུ་མ་ཟད། ལས་དོན་གང་ཅིར་ཕྱོགས་ལྷུང་སྤངས་ཏེ་རྩ་ཁྲིམས་གཞིར་བཟུང་སྲིད་འཛིན་གཞོན་པའི་ཆེ་མཐོང་དེ་ཉིད་གོང་དུ་འདེགས་ཐུབ་རྒྱུ་ཡིན་པ་ངས་ཡིད་ཆེས་ཞུ་བཞིན་ཡོད་ཅེས་གསུངས་འདུག
ད་དུང་སྐུ་ཉིད་མཆོག་རྒྱ་གར་གྱི་སྲིད་འཛིན་གཞོན་པ་གསར་པའི་ལས་གནས་ཐོག་ཕྱག་ལས་གནང་ཡུན་རིང་ལས་དོན་གང་ཅིར་བྱ་བ་ལམ་ལྷོངས་ཡོང་པའི་སྨོན་འདུན་ཞུ་རྒྱུ་མ་ཟད། རྒྱ་གར་གྱིས་ཡུན་རིང་ནས་༧གོང་ས་སྐྱབས་མགོན་ཆེན་པོ་མཆོག་དང་བོད་མི་རྣམས་ལ་རྒྱབ་སྐྱོར་གནང་སྟེ་བོད་ཀྱི་གནད་དོན་དེ་དབུ་མའི་ལམ་གྱི་སྲིད་བྱུས་ཀྱི་ཐབས་ལམ་ཐོག་ནས་སེལ་ཐབས་གནང་བཞིན་ཡོད་པར་རྒྱབ་སྐྱོར་གནང་རྒྱུ་ཡིན་པ་ཡིད་ཆེས་ཞུ་བཞིན་ཡོད་ཅེས་གསུངས་འདུག
དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་གིས་ཀྱང་རྒྱ་གར་གྱི་སྲིད་འཛིན་གཞོིན་པ་གསར་འདེམས་བྱུང་བར་འཚམས་འདྲི་བཀྲ་ཤིས་བདེ་ལེགས་ཞུས་འདུག
སྐུ་ཞབས་ Venkaiah Naidu་མཆོག་ནི་རྒྱ་གར་གྱི་BJP་ཆབ་སྲིད་ཚོགས་པའི་དབུ་ཁྲིད་རྒན་གྲས་ཤིག་ཡིན་ཞིང་། གཟའ་སྤེན་པའི་ཉིན་རྒྱ་གར་གྱི་སྲིད་འཛིན་གཞོན་པ་ཐེངས་༡༥་པར་འོས་འདེམས་གནང་ཡོད་པ་རེད།

གསར་འགོད་པ་གུ་རུ་ཆོས་སྐྱིད།