སྲིད་སྐྱོང་མཆོག་གིས་རྒྱ་གར་གྱི་སིམ་བྷོ་སིསེ་རྒྱལ་སྤྱིའི་གཙུག་ལག་སློབ་ཆེན་དུ་བོད་དོན་གཏམ་བཤད་གནང་འདུག

དེ་ཡང་ཕྱི་ཟླ་༩ཚེས་༥ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་(Maharashtra)་མངའ་སྡེའི་གྲོང་ཁྱེར་པུ་ན་རུ་རྟེན་གཞི་བྱས་པའི་སིམ་བྷོ་སིསེ་རྒྱལ་སྤྱིའི་གཙུག་ལག་སློབ་ཁང་(Symbiosis International Deemed University)དུ་ཆེད་ཕེབས་ཀྱིས། རྒྱ་གར་གྱི་ཕྱི་འབྲེལ་གཞུང་ཚབ་ཟུར་པ་(Gautam Bambawale)་ལགས་དང་། སིམ་བྷོ་སིསེ་རྒྱལ་སྤྱིའི་གཙུག་ལག་སློབ་ཁང་གི་ངེས་སྟོན་པ་(Dr Shweta Sinha Deshpande)་ལགས། དེ་བཞིན་སྤྱི་ཚོགས་ཚན་རིག་སྡེ་ཚན་གྱི་སློབ་དཔོན་རྣམ་པ་དང་སློབ་གཉེར་བ་སོགས་ལྷན་འཛོམས་ཐོག་སྲིད་སྐྱོང་མཆོག་གིས་བོད་དང་བོད་ཀྱི་ཆབ་སྲིད་ཀྱི་གལ་གནད་སྐོར་གཏམ་བཤད་གནང་སྐབས། བོད་ནི་ས་ཁམས་འཐབ་བྱུས་ཀྱི་ཐོག་ནས་རྒྱ་གར་གྱི་བདེ་འཇགས་ལ་ཧ་ཅང་གལ་ཆེན་པོ་ཡིན་པ་མ་ཟད། ཁོར་ཡུག་གི་ཐོག་ནས་ཀྱང་བོད་དེ་ཨེ་ཤེ་ཡའི་གཙང་ཆུ་མང་པོའི་འབྱུང་ཁུངས་ཡིན་པས་རྒྱ་གར་གཙོས་པའི་གཤམ་འོག་རྒྱལ་ཁབ་མང་པོའི་འཚོ་རྟེན་ལ་གནད་འགག་རང་བཞིན་གྱི་འབྲེལ་བ་ཆེན་པོ་ཆགས་ཀྱི་ཡོད་ཅེས་དང་། བོད་མི་ཚོས་རྒྱ་གར་གྱི་གནའ་བོའི་ཤེས་རིག་གལ་ཆེ་ཤོས་ཤིག་དུས་རབས་མང་པོའི་རིང་བདག་གཅེས་རྒྱུན་འཛིན་བྱས་ཡོད་པས། ད་ལྟའི་དུས་སྐབས་སུ་རིག་གནས་དེ་དག་ནི་གནའ་བོའི་རྒྱ་གར་གྱི་ཤེས་རིག་གི་བང་མཛོད་ལྟ་བུར་གྱུར་ཡོད་པ་ནན་བརྗོད་གནང་འདུག

དེ་བཞིན་སྲིད་སྐྱོང་མཆོག་གིས་ཕྱི་ལོ་༡༩༥༡ལོར་རྒྱ་ནག་དམར་པོའི་སྲིད་གཞུང་གིས་བོད་ཐོག་བཙན་ཤེད་ཀྱིས་གྲོས་མཐུན་དོན་ཚན་བཅུ་བདུན་ཟེར་བ་ཞིག་ལ་མིང་རྟགས་བཀོད་བཅུག་སྟེ་བོད་བཙན་བཟུང་བྱས་པ་གསལ་སྟོན་གནང་བ་དང་ཆབས་ཅིག རྒྱ་ནག་གིས་བོད་ས་བཙན་བཟུང་བྱས་པ་ལ་བརྟེན་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྒྱ་གར་དུ་བཙན་བྱོལ་ལ་ཕེབས་ནས་བོད་བརྒྱུད་ནང་བསྟན་དང་མགོན་པོ་མཆོག་གི་མཚན་སྙན་འཛམ་གླིང་ཡོངས་སུ་གྲགས་པ་དང་། དེ་བརྒྱུད་༧གོང་ས་མཆོག་ནས་བྱམས་བརྩེ་དང་། ཞི་བདེའི་རིག་གཞུང་འཛམ་གླིང་མི་མང་ལ་ངོ་སྤྲོད་ཁྱབ་སྤེལ་མཛད་དེ། སྐྱེ་འགྲོ་ས་ཡ་མང་པོར་ཕན་ཐོགས་རླབས་ཆེན་བྱུང་ཡོད་པ་གསལ་བཤད་གནང་འདུག
གཞན་འཕགས་བོད་བར་གྱི་ལོ་རྒྱུས་རང་བཞིན་ལྡན་པའི་ཆོས་རིག་གི་འབྲེལ་བ་སྤྱི་དང་། ལྷག་པར་ནང་པ་སངས་རྒྱས་པའི་བསྟན་པ་ཕྱི་ལོའི་དུས་རབས་བདུན་པ་ནས་བཟུང་། བོད་ནང་ཆོས་རྒྱལ་རིམ་བྱོན་གྱི་བཀའ་དྲིན་ལ་བརྟེན་ནས་དར་འཕེལ་གྱི་བྱུང་རིམ་ངོ་སྤྲོད་གནང་བའི་ཁར། ད་ལྟའི་དུས་སྐབས་སུ་རྒྱ་གར་གཞུང་ནས་ཐད་ཀར་བོད་མིའི་སྒྲིག་འཛུགས་ལ་ཁྲིམས་མཐུན་ངོས་འཛིན་གནང་གི་མེད་ནའང་། དགོས་ངེས་མཐུན་འགྱུར་ཕན་གྲོགས་གང་ཐུབ་གནང་གི་ཡོད་པ་དང་། ལྷག་པར་དུ་རྒྱ་གར་གཞུང་དམངས་གཉིས་ནས་འདས་པའི་ལོ་ངོ་༦༥ལྷག་རིང་བཙན་བྱོལ་བོད་མིའི་སྤྱི་ཚོགས་བདེ་དོན་ལ་སྨན་པའི་རྒྱབ་སྐྱོར་ཧ་ཅང་ཚད་མཐོ་པོ་གནང་ཡོད་པ་དེར་བོད་མི་རྣམས་ནས་དུས་རྒྱུན་དུ་བཀའ་དྲིན་རྗེས་དྲན་ཞུ་གི་ཡོད་པ་སོགས་གསུངས་འདུག
དེའི་རྗེས་ཚོགས་བཅར་བ་དགེ་སློབ་ཁག་ཅིག་གི་དྲི་བར་ལན་འདེབས་གསལ་བཤད་གནང་ཡོད་པ་སོགས་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་འདུག

གསར་འགོད་པ། ཚེ་དབང་དངོས་གྲུབ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།