༄༅༎ལྷོ་ཨ་ཕེ་རི་ཀའི་གྲོས་ཚོགས་ཀྱི་འཐུས་མི་གཉིས་ཀྱིས་བར་ལམ་བོད་ནང་རང་ལུས་མེ་བསྲེག་གཏོང་བའི་ཛ་དྲག་གི་གནས་སྟངས་གྲོས་ཚོགས་ཐོག་གླེང་སློང་གནང་ཡོད་པའི་སྐོར་དེ་རིང་རེས་གཟའ་པ་སངས་ཉིན་བཙན་བྱོལ་བོད་མིའི་དྲ་རྒྱའི་ཐོག་གནས་ཚུལ་སྤེལ་ཡོད་པ་རེད།
དེ་ཡང་འདི་ལོའི་ཕྱི་ཟླ་གསུམ་པ་ནས་འགོ་བཙུགས་ཏེ། བོད་ཀྱི་མདོ་སྨད་རྔ་པ་དང་དཀར་མཛེས་ཁུལ་གྱི་བོད་མི་ན་གཞོན་བཅིུག་གིས་རང་ལུས་མེ་བསྲེག་བཏང་བའི་དོན་རྐྱེན་རིམ་པ་ཐོན་པའི་རྗེས། ལྷོ་ཨ་ཕེ་རི་ཀའི་གྲོས་ཚོགས་ཀྱི་འཐུས་མི་སྐུ་ཞབས་མའ་རི་ཡོ་ཨམ་སྦོརོ་སི་ནི་ཞུ་བ་དང༌། སྐུ་ཞབས་སི་ཀྲིལྦ་མོཀ་ག་ལ་པ་རྣམ་གཉིས་ཀྱིས་ཕྱི་ཟླ་བཅིུག་པའི་ཚེས་བརྒྱད་དང་ཚེས་བཅུ་སོ་སོར་ལྷོ་ཨ་ཕེ་རི་ཀའི་གྲོང་ཁྱེར་ཁེཔ་ཀྲའོན་དུ་གྲོས་ཚོགས་ཐོག་བོད་ནང་གི་བོད་མིས་རང་ལུས་མེ་བསྲེག་གཏོང་བའི་ཛ་དྲག་གི་གནས་སྟངས་ཐོག་གཏམ་བཤད་གནང་ཡོད་ཅིང༌། སྐུ་ཞབས་མའ་རི་ཡོ་ཨེམ་སྦོརོ་སི་ནི་ཡི་གཏམ་བཤད་ནང་དུ། ཉེ་ཆར་ལོ་ན་༣༥ ཡིན་པའི་བཙུན་མ་དཔལ་ལྡན་ཆོས་མཚོ་ལགས་ཀྱིས་རྒྱ་ནག་གཞུང་གི་མུ་མཐུད་དྲག་གནོན་གྱི་བྱ་སྤྱོད་ལག་བསྟར་བྱེད་བཞིན་པར་མི་བཟོད་པར་རང་ལུས་མེ་བསྲེག་བཏང་བའི་གནས་ཚུལ་ལུང་འདྲེན་གནང་སྟེ། ཉེ་བའི་ཆར་བོད་ནང་དུ་བོད་མི་ཚོས་མུ་མཐུད་ནས་རང་ལུས་མེ་བསྲེག་བཏང་སྟེ་རྒྱ་ནག་གཞུང་གིས་མུ་མཐུད་ནས་འགྲོ་བ་མིའི་ཐོབ་ཐང་རྩིས་མེད་གཏོང་བའི་བྱ་སྤྱོད་ལ་ངོ་རྒོལ་བྱེད་པ་དེ་ནི། རྒྱ་ནག་གཞུང་གིས་བོད་མིའི་ཐོག་འཛིན་པའི་སྲིད་ཇུས་ཇེ་སྡུག་ཏུ་ཕྱིན་པའི་མཚོན་རྟགས་ཡིན་ཞིང༌། ཁོང་གི་ཆབ་སྲིད་ཚོགས་པ་དམངས་གཙོ་མནའ་སྦྲེལ་ཚོགས་པས། ཁོང་རང་ཉིད་ཀྱི་གཞུང་ལ་རྒྱ་ནག་གཞུང་གི་བྱ་སྤྱོད་དེ་དག་ཐོག་དོ་སྣང་བྱ་དགོས་པ་དང༌། ལྷག་པར་དུ་བྱ་སྤྱོད་དེ་དག་ཐོག་གནོན་ཤུགས་སྤྲོད་དགོས་པའི་འབོད་སྐུལ་ཞུ་རྒྱུ་ཡིན། ང་ཚོའི་ལྷོ་ཨ་ཕེ་རི་ཀའི་རྒྱལ་ཁབ་དེ་ཡང་རྒྱལ་སྤྱིའི་གནོན་ཤུགས་ལ་བརྟེན་ནས་མི་རིགས་དབྱེ་འབྱེད་ཀྱི་ལམ་ལུགས་མེད་པར་གྱུར་ཡོད་པ་བཞིན་རྒྱལ་ཁབ་གཞན་གྱི་ནང་དུ་རང་ལུས་མེ་བསྲེག་གཏོང་བའི་ཛ་དྲག་གི་དཀའ་ངལ་སེལ་ཐབས་ལ་ང་ཚོས་རོགས་རམ་བྱ་དགོས་ཀྱི་རེད་ཅེས་གསུང་ཡོད་པ་རེད། དེ་བཞིན་སྐུ་ཞབས་སི་ཀྲིལྦ་མོཀ་ག་ལ་པ་ཡི་གཏམ་བཤད་ནང། བཙུན་མ་དཔལ་ལྡན་ཆོས་མཚོ་ལགས་ཀྱིས་རང་ལུས་ལ་མེ་མ་སྤར་བའི་གོང། བོད་ལ་རང་དབང་དགོས། རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག རྒྱལ་བ་རིན་པོ་ཆེ་བོད་དུ་གདན་ཞུ་བྱ་དགོས་པའི་རེ་འབོད་བྱས་ཡོད་པའི་གནས་ཚུལ་ལུང་འདྲེན་གནང་སྟེ། ང་ཚོ་ཚང་མའི་ནུས་པ་མཉམ་དུ་སྒྲིལ་ནས་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་གྱི་སྲིད་ཇུས་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱ་སྤྱོད་མཚམས་འཇོག་ཡོང་ཐབས། བོད་ནང་དུ་ཆོས་དད་རང་དབང་དང༌། སྨྲ་བརྗོད་རང་དབང་གི་ཐོབ་ཐང་སྤྲོད་དགོས་པ། རང་དབང་ལྡན་པའི་གསར་འགྱུར་ལས་རིགས་དང༌། རྒྱལ་སྤྱིའི་གྲོས་ཚོགས་ཀྱི་སྐུ་ཚབ་བོད་ནང་གི་དངོས་ཡོད་གནས་སྟངས་ཞིབ་མཇུག་བྱེད་དུ་འགྲོ་བསྐྱོད་ཆོག་པར་རྒྱ་ནག་གཞུང་ལ་ང་ཚོའི་འབོད་སྒྲ་སྒྲོག་དགོས་ཀྱི་རེད་ཅེས་གསུང་ཡོད་པ་རེད།
