བསྟན་འཛིན་ཆོས་དབྱིངས་ལགས་ཀྱི་སྐུ་ཕུང་བཞུགས་སྒར་དུ་འབྱོར་བ།

༄༅༎རྒྱ་གར་ཝཱ་ར་ཎ་སིའི་མཐོ་སློབ་ཀྱི་སློབ་མ་བསྟན་འཛིན་ཆོས་དབྱིངས་ལགས་ཀྱིས་ཕྱི་ཚེས་༡༤ཉིན་རང་ལུས་མེར་སྲེག་གནང་ཏེ་ཚེས་༢༢ཉིན་འདས་གྲོངས་སུ་གྱུར་བའི་རྗེས་ཁོང་གི་སྐུ་ཕུང་ལྡི་ལི་ནས་བཞུགས་སྒར་དུ་དེ་རིང་འབྱོར་ཡོད་འདུག  བསྟན་འཛིན་ཆོས་དབྱིངས་ལགས་ཀྱི་སྐུ་ཕུང་བཞུགས་སྒར་དུ་འབྱོར་བའི་སྐབས་ཁོང་གི་ཕ་མ་གཉིས་ཀྱིས་མ་འོངས་བོད་པའི་གཞོན་སྐྱེས་ཚོས་བོད་ཀྱི་རྩ་དོན་ཆེད་སློབ་སྦྱོང་ཧུར་ཐག་གནང་བ་ལས་རང་ལུས་མེར་སྲེག་རྩ་བ་ནས་མ་གནང་བའི་འབོད་སྐུལ་ཤུགས་ཆེ་གནང་ཡོད་འདུག   བསྟན་འཛིན་ཆོས་དབྱིངས་ལགས་ཀྱི་ཨ་མ་ལགས་ནས་ཁོང་ད་ལོ་སློབ་གྲྭ་ནས་ནང་ལ་གུང་སེང་དུ་སླེབས་པའི་སྐབས་ཁོང་གིས་མ་འོངས་བོད་དོན་ཆེད་ལས་ཀ་ཆེན་པོ་ཞིག་བྱས་ཚེ་ཨ་མ་ཁྱེད་ཀྱི་ག་རེ་བསམ་པ་འདུག་ཅེས་སྐད་ཆ་དྲིས་པ་དང་། རང་ལུས་མེར་སྲེག་བཏང་ནས་སྨན་ཁང་དུ་བཞུགས་པའི་སྐབས་སུ་ཡང་ཁོང་གིས་ཨ་མ་ལགས་སུ་མིག་ཆུ་མ་བཏང་རོགས་ཅེས་གསུངས་ཡོད་པའི་སྐོར་འགྲེལ་བརྗོད་གནང་འདུག  བསྟན་འཛིན་ཆོས་དབྱིངས་ལགས་ཀྱི་པཱ་ལགས་ནས་བོད་མིའི་མི་འབོར་ཧ་ཅང་ཉུང་ཉུང་ཡིན་པར་བརྟེན་རང་ལུས་མེར་སྲེག་རྩ་བ་ནས་བཏང་རྒྱུ་མེད་པ་དང་། མ་འོངས་གཞོན་སྐྱེས་ཚོས་སློབ་སྦྱོང་ལ་དོ་སྣང་གནང་ཏེ་བོད་དོན་རྩོད་ལེན་གནང་རྒྱུ་དེ་གལ་ཆེ་ཡིན་པའི་འབོད་སྐུལ་གནང་འདུག།
གསར་འགོད་པ་འཆི་མེད་ལྷུན་གྲུབ།