༄༅༎དབུས་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པར་གཞིགས་ན་ ཕྱི་ཚེས་༦ ཉིན་ཨོ་སི་ཀྲོ་ལི་ཡ་ལྗང་ཁུ་ཚོགས་པའི་རྒྱལ་ཡོངས་ཚོགས་ཆེན་འཚོགས་སྐབས་ཚོགས་པ་དེའི་ངོས་ནས་བོད་མི་རང་ཉིད་ཀྱིས་འདེམས་ཐོན་བྱུང་བའི་གཞུང་ལ་ངོས་འཛིན་བྱ་རྒྱུ་ཙམ་མ་ཟད བོད་ནང་གི་བོད་མི་རྣམས་ལ་རྒྱ་ནག་གཞུང་ནས་དམ་བསྒྲགས་དང་བཙན་གནོན་བྱེད་བཞིན་པའི་སྲིད་བྱུས་མཚམས་འཇོག་དགོས་པའི་གྲོས་ཆོད་བཞག་འདུག་ སྐབས་དེར་ལྗང་ཁུའི་ཚོགས་པའི་གྲོས་ཚོགས་གོང་མའི་མགྲིན་ཚབ་པ་སེ་རའ་ཧེན་སེན་ཡང་ལགས་ཀྱིས་ཨོ་སི་ཀྲོ་ལི་ཡ་དེ་སྔ་ཆབ་སྲིད་ཚོགས་པ་རྣམས་ཀྱིས་ད་ལྟ་བར་བོད་དོན་སྣང་མེད་དུ་བཞག་ཡོད་ནའང་ལྗང་ཁུ་ཚོགས་པའི་ངོས་ནས་སླར་ཡང་བོད་མིའི་ཆོས་དད་རང་དབང་དང་ སྨྲ་བརྗོད་རང་དབང་སོགས་ཀྱི་སྐོར་ལ་མུ་མཐུད་བགྲོ་གླེང་བྱ་རྒྱུ་ཡིན་གསུངས་ཡོད་པ་མ་ཟད་ ལྷག་པར་ཁོང་གིས་འདི་ལོ་ཕྱི་ཟླ་ ༣ པ་ནས་བཟུང་ད་བར་བོད་ནང་གི་བོད་མི་བཅུ་གཅིག་གིས་རྒྱ་གཞུང་གི་དྲག་གནོན་འོག་གཞི་རྩའི་འགྲོ་བ་མིའི་ཐོབ་ཐང་མེད་པའི་འུ་ཐུག་ཐབས་ཟད་ཀྱིས་རང་ལུས་མེར་བསྲེག་བཏང་སྟེ་ དགེ་འདུན་པ་བཞི་དང་བཙུན་མ་གཉིས་འདས་གྲོངས་སུ་གྱུར་བའི་གནས་སྟངས་སྤྱི་དང་ ཡང་སྒོས་བོད་ནང་གི་བོད་མིའི་གནས་སྟངས་ཐོག་ལྗང་ཁུ་ཚོགས་པའི་ཚོགས་མི་རྣམས་ནས་ལྟ་ཞིབ་ནན་ཏན་བྱ་རྒྱུ་ཡིན་སྐོར་གསལ་འདོན་གནང་ཡོད་པ་རེད་ ཡང་ལྕམ་སེ་རའ་ཧེན་སེན་ཡང་ལགས་ཀྱིས་ཟླ་བ་སྔོན་མའི་ཕྱི་ཚེས་ ༣༡ ཉིན་ཨོ་སི་ཀྲོ་ལི་ཡ་གྲོས་ཚོགས་ཀྱི་འཐུས་མི་མང་དག་ཅིག་གིས་ཁ་ཙམ་གྱིས་བོད་དོན་གླེང་བ་ལས་དོན་དངོས་སུ་ གྲོས་ཚོགས་གོང་མའི་ལྷན་ཚོགས་སྐབས་ རྒྱ་གཞུང་གིས་བོད་ནང་གཞི་རྩའི་འགྲོ་བ་མིའི་ཐོབ་ཐང་སྤྲོད་ཀྱི་མེད་པ་དེ་འཛམ་གླིང་ཡོངས་ནས་མཐོང་གསལ་ཡིན་བཞིན་དུ་གྲོས་ཚོགས་ནང་གླེང་སློང་བྱས་མེད་པ་དེས་ རྒྱ་ནག་གཞུང་ལ་ཉེན་བརྡ་གཏོང་རྒྱུའི་གོ་སྐབས་ཤོར་ཟིན་པ་རེད་ཅེས་གསུངས་འདུག ཨོ་སི་ཀྲོ་ལི་ཡ་ལྗང་ཁུ་ཚོགས་པ་དེ་བཞིན་ཡུལ་དེའི་ནང་སྔ་ཕྱི་བར་གསུམ་དུ་་བོད་དོན་ཐོག་རྒྱབ་སྐྱོར་གྱི་ལངས་ཕྱོགས་བརྟན་པོ་བཟུང་མཁན་གྱི་ཚོགས་པ་ཞིག་ཡིན་འདུག་པ་བཅས་ཀྱི་གནས་ཚུལ་ཐོན་འདུག་།
