དེ་ཡང་ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་གནས་ཚུལ་སྤེལ་བར་གཞིགས་ན། ༡༩༨༩ལོར་པེ་ཅིང་གནམ་བདེ་སྒོ་མོ་ཆེའི་མདུན་ཐང་དུ་དྲུག་བཞིའི་ལས་འགུལ་སྤེལ་བའི་ཐོག་རྒྱ་ནག་གཞུང་གིས་དྲག་གནོན་བྱས་ནས་ལོ་ངོ་༣༤འཁོར་བའི་དུས་དྲན་སླེབས་ལ་ཉེ་བའི་སྤྱི་ཟླ་༦པའི་ཚེས་༣ཉིན། པེ་ཅིན་དུ་དེ་སྔ་ཨོ་ལིམ་པིཀསི་རྩེད་འགྲན་འཚོགས་སའི་རྩེད་ཐང་བྱིའུ་ཚང་ཞེས་པའི་ནང་། ཐེ་ཝན་གྱི་གླུ་གཞས་འཁྲབ་སྟོན་རུ་ཁག་ཟླ་ལྔ་བའི་གནམ་ཞེས་བས་འཁྲབ་སྟོན་སྐབས། གློ་བུར་དུ་བྱིའུ་ཚང་གི་ཕྱི་རོལ་གྱི་ལྕགས་སྟེགས་ལིང་ལོང་ཐ་ཞེས་པའི་སྟེང་བུད་མེད་ཞིག་ཐོན་པའི་ལག་ཏུ་ཨ་མི་རི་ཀའི་རྒྱལ་དར་དང་མཉམ་དུ་འབོད་ཚིག་འདྲ་མིན་འཁོད་པའི་འཕྲེད་དར་འཕྱར་བ་དང་། གཞན་ཨ་རིའི་རང་བཙན་གསལ་བསྒྲགས་ཡིག་ཆ་པར་སློག་བརྒྱབ་པ་མང་པོ་གནམ་ལ་གཏོར་ནས་ངོ་རྒོལ་བྱས་ཡོད་འདུག
ཁོང་མོའི་ངོ་རྒོལ་གྱི་འབོད་སྒྲ་ཡིག་ཆའི་ནང་། ཨ་རིའི་རང་བཙན་གསལ་བསྒྲགས་ཀྱི་ཡིག་ཆ་དང་མཉམ། རྒྱ་ནག་མི་དམངས་རང་དབང་རང་བཙན་ལྡན་པའི་སྤྱི་འབངས་ཤིག་ཆགས་དགོས་པ་ལས། སྲིད་དོན་ཚོགས་པ་ཞིག་ལ་བསམ་པ་རྣམ་དག་ཡོད་མཁན་ཞིག་མ་ཡིན་པར། དམངས་གཙོ་དང་རང་དབང་ལྡན་པའི་རྒྱ་ནག་ཞིག་གསར་སྐྲུན་བྱེད་ཆེད་དུ་ལས་འགུལ་སྤེལ་དགོས་བའི་འབོད་སྐུལ་བྱས་ཡོད་འདུག
གནས་ཚུལ་བྱུང་བའི་རྗེས་གོང་ཞུས་བུ་མོ་དེ་སྤྱི་བདེ་མི་སྣས་བཙན་ཁྲིད་འཛིན་བཟུང་བྱས་བ་བརྙན་ལམ་དུ་མཐོང་རྒྱུ་ཡོད་པ་ལས། ཁོང་མོའི་མིང་དང་དེའི་རྗེས་ཀྱི་གནས་ཚུལ་སོགས་ཤེས་རྟོགས་བྱུང་མི་འདུག
༢༠༢༢ལོར་རྒྱ་ནག་དམར་ཤོག་ཚོགས་པའི་ཚོགས་ཆེན་འཚོགས་ལ་ཉེ་བའི་སྐབས། རྒྱ་ནག་གི་རྒྱལ་ས་པེ་ཅིང་གི་འཁྲུག་ཆ་དོད་པའི་ས་ཁུལ་ཧའེ་ཏེན་ཟེར་བའི་སི་ཐུང་ཟམ་ཆེན་གི་ཐོག་རས་གཞི་དཀར་པོའི་སྟེང་སྣག་ཚ་དམར་པོས་བྲིས་པའི་འཕྲེད་དར་མི་འདྲ་བ་ཁག་གཉིས་དཔྱང་སྟེ། རྒྱ་ནག་གི་འགོ་ཁྲིད་ཞི་ཅིན་ཕིང་གནས་དབྱུང་གཏོང་དགོས་པ་དང་། སྤྱི་ཚོགས་དཀའ་ངལ་དང་འབྲེལ་བའི་མི་དགོས་པ་ལྔའི་འབོད་ཚིག་བཀོད་དེ་ངོ་རྒོལ་བྱས་མྱོང་ཡོད་པ་རེད།
གཞན་གསར་ལམ་ཁག་གི་གནས་ཚུལ་ལྟར་ན། སྤྱི་ཟླ་༦པའི་ཚེས་༤ཉིན་ཧོང་ཀོང་ནང་དྲུག་བཞིའི་དོན་རྐྱེན་ལ་དྲན་གསོ་ཞུ་མཁན་མི་གྲངས་༢༣ཧོང་ཀོང་ཉེན་རྟོག་པས་སྤྱི་ཚོགས་བརྟན་བརླིང་ལ་གཏོར་སྐྱོན་བཏང་བའི་ཉེས་མིང་འོག་འཛིན་བཟུང་བཙན་ཁྲིད་བྱས་ཡོད་པ་མ་ཟད། གཞན་ལོ་ན་༥༣ལ་སོན་པའི་བུད་མེད་ཞིག་གིས་ཉེན་རྟོག་པའི་ལས་དོན་ལ་འགོག་རྐྱེན་བཟོས་པའི་ཉེས་མིང་འོག་འཛིན་བཟུང་བྱས་ཡོད་འདུག
སྤྱིར་དེ་སྔ་ཧོང་ཀོང་ནང་དྲུག་བཞིའི་དོན་རྐྱེན་ལ་རྗེས་དྲན་བྱས་པ་སོགས་དམངས་གཙོའི་ལས་འགུལ་སྤེལ་རྒྱུར་གཞུང་གིས་བཀག་རྒྱ་མེད་ནའང་། ཉེ་བའི་ནང་རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ལག་བསྟར་བྱས་ནས། ཧོང་ཀོང་གི་དམངས་གཙོའི་རང་དབང་ལ་དོ་ཕོག་ཚབས་ཆེན་བཏང་དང་གཏོང་བཞིན་པ་དང་། དྲུག་བཞིའི་དོན་རྐྱེན་ལ་རྗེས་དྲན་སོགས་མི་མང་འཛོམས་ནས་ལས་འགུལ་སྤེལ་རྒྱུར་ས་གནས་གཞུང་གིས་དམ་དྲག་ནན་མོ་བྱས་དང་བྱེད་བཞིན་ཡོད་པ་རེད།
ཐེ་ཝན་དང་། དབྱིན་ཡུལ། འཇར་མན། ཨ་རི་སོགས་ཡུལ་ལུང་མང་པོར་རྣམ་པ་འདྲ་མིན་གྱི་ཐོག་ནས་དྲུག་བཞིའི་དོན་རྐྱེན་ལ་རྗེས་དྲན་བྱས་ཡོད་པ་དང་། ཨ་རིའི་གྲོང་ཁྱེར་ནིའུ་ཡོག་ཏུ་དྲུག་བཞིའི་དྲན་གསོ་ཁང་ཞེས་པའི་འགྲེམས་སྟོན་ཁང་ཞིག་དབུ་འབྱེད་གནང་འདུག
གསར་འགོད་པ། སྐལ་བཟང་སྒྲོལ་མ། བསོད་ནམས་ལྷ་མོ།
རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།