ཨོསི་ཊརེ་ལི་ཡ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་བློ་ཚབས་ཡོད་པ་གསལ་སྟོན་གནང་འདུག

དེ་ཡང་ཉེ་སྔོན་ཨ་རིའི་གཞུང་གིས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་གཏན་འབེབས་གནང་བ་འབྲེལ། ཨེ་ཤེ་ཡ་རང་དབང་རླུང་འཕྲིན་ཁང་གིས་ཨོསི་ཊརེ་ལི་ཡ་(Australia)་གཞུང་ནས་ཀྱང་དེ་ལྟ་བུའི་ཁྲིམས་ཡིག་གཏན་འབེབ་གནང་བ་སོགས་བརྒྱུད་བོད་དོན་ལ་རྒྱབ་སྐྱོར་གནང་མིན་གྱི་ཐད་ནས་བཅར་འདྲི་ཞུས་པར། སྤྱི་ཚེས་༡༢ཉིན་ཡིག་ཐོག་ནས་ལན་འདེབས་གནང་བའི་ནང་། ཨོསི་ཊརེ་ལི་ཡ་གཞུང་གི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་བློ་ཚབས་ཆེན་པོ་ཡོད་པ་གསལ་སྟོན་གནང་བ་དང་འབྲེལ། ཨོསི་ཊརེ་ལི་ཡ་གཞུང་གི་ངོས་ནས་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་ཐད་བློ་ཚབས་ཆེན་པོ་ཡོད། ལྷག་པར་དུ་རྒྱ་ནག་གཞུང་གིས་བོད་ཀྱི་བྱིས་པ་རྣམས་རང་གི་ཕ་མ་དང་ཁ་བྲལ་ནས་བཙན་གྱིས་བཅའ་སྡོད་སློབ་གྲྭར་བཅུག་པ་དང་། བོད་མི་ཞི་བའི་ལས་འགུལ་སྤེལ་མཁན་རྣམས་འཛིན་བཟུང་བཙོན་འཇུག་བྱེད་པ། བོད་ཀྱི་ཆོས་ལུགས་བྱེད་སྒོ་ཁག་ལ་དམ་དྲག་ཤུགས་ཆེ་བྱེད་བཞིན་པ་སོགས་ཀྱི་གནས་སྟངས་ཐད་བློ་ཚབས་ཆེན་པོ་ཡོད་པ་བཞིན། ཨོསི་ཊརེ་ལི་ཡ་གཞུང་གི་ངོས་ནས་ནམ་རྒྱུན་རྒྱ་ནག་ལ་གནད་དོན་འདི་དག་གི་ཐད་ནས་གླེང་སློང་གནང་གི་ཡོད་པ་གསལ་བཏོན་གནང་འདུག
ལྷག་པར་དུ་ཉེ་སྔོན་རྒྱ་ནག་གི་ཕྱི་སྲིད་བློན་ཆེན་ཨོསི་ཊརེ་ལི་ཡར་གཞུང་འབྲེལ་ཕྱོགས་བསྐྱོད་དུ་འབྱོར་སྐབས་སུ་ཡང་། ཨོསི་ཊརེ་ལི་ཡའི་ཕྱི་སྲིད་བློན་ཆེན་གྱིས་གོང་ཞུས་གནད་དོན་དེ་དག་གླེང་སློང་གནང་བའི་ཐོག ཨོསི་ཊརེ་ལི་ཡ་གཞུང་གི་ངོས་ནས་རྒྱ་ནག་གཞུང་ལ་༧གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དོན་ཕན་ལྡན་པའི་གྲོས་མོལ་བརྒྱུད་བོད་ཀྱི་རྩ་བའི་གནད་དོན་ཐག་གཅོད་བྱེད་དགོས་པའི་འབོད་སྐུལ་གནང་ཡོད་པ་སོགས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ནས་ལན་འདེབས་གནང་བའི་ནང་འཁོད་འདུག

གསར་འགོད་པ། བསོད་ནམས་ལྷ་མོ། བསྟན་འཛིན་བདེ་སྐྱིད།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།