ཨོསི་ཊརེ་ལི་ཡའི་ཕྱི་སྲིད་བློན་ཆེན་གྱིས་རྒྱ་ནག་གི་ཕྱི་སྲིད་བློན་ཆེན་དང་མཉམ་བོད་དོན་གླེང་འདུག

2024.03.20
ཨོསི་ཊརེ་ལི་ཡའི་ཕྱི་སྲིད་བློན་ཆེན་གྱིས་རྒྱ་ནག་གི་ཕྱི་སྲིད་བློན་ཆེན་དང་མཉམ་བོད་དོན་གླེང་འདུག ཨོསི་ཊརེ་ལི་ཡའི་(Australia)་ཕྱི་སྲིད་བློན་ཆེན་པེ་ནི་ཝོང་(Penny Wong)་དང་རྒྱ་ནག་གི་ཕྱི་སྲིད་བློན་ཆེན་ཝང་ཡིས་(Wang Yi)་མཇལ་འཕྲད་སྐབས།
David GRAY / AFP

ཨོསི་ཊརེ་ལི་ཡའི་ཕྱི་སྲིད་བློན་ཆེན་གྱིས་ཨོསི་ཊརེ་ལི་ཡའི་ནང་འཚམས་གཟིགས་གནང་བཞིན་པའི་རྒྱ་ནག་གི་ཕྱི་སྲིད་བློན་ཆེན་ཝང་ཡིས་དང་མཇལ་འཕྲད་གནང་སྐབས་བོད་མིའི་འགྲོ་བ་མིའི་ཐོབ་ཐང་གི་གནད་དོན་གླེང་སློང་གནང་ཡོད་པ་ཨོསི་ཊརེ་ལི་ཡའི་ཕྱི་སྲིད་དང་ཚོང་དོན་ལྷན་ཁང་གི་མགྲིན་ཚབ་པ་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ལན་འདེབས་གནང་བའི་ནང་གསལ་འདུག
ཕྱི་ཟླ་༣་པའི་ཚེས་༢༠ཉིན་ཨོསི་ཊརེ་ལི་ཡའི་(Australia)་ཕྱི་སྲིད་བློན་ཆེན་པེ་ནི་ཝོང་(Penny Wong)་དང་རྒྱ་ནག་གི་ཕྱི་སྲིད་བློན་ཆེན་ཝང་ཡིས་(Wang Yi)་མཇལ་འཕྲད་གནང་གྲུབ་མཚམས་ཨོསི་ཊརེ་ལི་ཡའི་ཕྱི་སྲིད་ལྷན་ཁང་གིས་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ལ་ཡིག་ཐོག་ལན་འདེབས་གནང་པའི་ནང་། བོད་ནང་གི་འགྲོ་བ་མིའི་ཐོབ་ཐང་དང་རང་དབང་གི་གནད་དོན་ཚུད་པའི་རྒྱ་ནག་སྤྱིའི་འགྲོ་བ་མིའི་ཐོབ་ཐང་ཇེ་སྡུག་ཏུ་འགྲོ་བཞིན་པའི་གནད་དོན་ཁག་ལ་ཨོསི་ཊརེ་ལི་ཡ་གཞུང་གིས་ཐུགས་ཚབས་གནང་གི་ཡོད་པ་དང་། གནད་དོན་འདི་དག་ཨོསི་ཊརེ་ལི་ཡའི་ཕྱི་སྲིད་བློན་ཆེན་(Penny Wong)་གྱིས་རྒྱ་ནག་གི་ཕྱི་སྲིད་བློན་ཆེན་ཝང་ཡིས་དང་མཉམ་ཕྱི་ཟླ་༣ཚེས་༢༠ཉིན་ཨོསི་ཊརེ་ལི་ཡ་དང་རྒྱ་ནག་བར་གྱི་ཕྱི་འབྲེལ་དང་ཐབས་བྱུས་ཀྱི་གྲོས་མོལ་གནང་སྐབས་ཐད་ཀར་གླེང་སློང་གནང་ཡོད་པ་བཀོད་འདུག
ད་དུང་ཨོསི་ཊརེ་ལི་ཡའི་ཕྱི་སྲིད་གནད་དོན་དང་ཚོང་དོན་ལས་ཁུངས་ཀྱི་མགྲིན་ཚབ་པས་གནང་པའི་ལན་འདེབས་གསལ་བཤད་དེའི་ནང་། ཨོསི་ཊརེ་ལི་ཡའི་ངོས་ནས་འགྲོ་བ་མིའི་ཐོབ་ཐང་སྲུང་སྐྱོབ་འབྱུང་ཆེད་མུ་མཐུད་དུ་བཀའ་མོལ་གནང་རྒྱུ་ཡིན་པ་དང་། སླད་ཕྱིན་རན་མཚམས་ཀྱི་གོ་སྐབས་ཁག་སྤྱད་ནས་རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནད་དོན་ཐད་ལས་དོན་འགན་འཁྲི་ཁག་སྒྲུབ་དགོས་པའི་འབོད་སྐུལ་མུ་མཐུད་ཞུ་རྒྱུ་ཞེས་བཀོད་འདུག

ཚེས་༢༠ཉིན་རྒྱ་ནག་གི་ཕྱི་སྲིད་བློན་ཆེན་ཝང་ཡིས་ཨོསི་ཊརེ་ལི་ཡའི་ནང་འཚམས་གཟིགས་འབྱོར་བའི་སྐབས་དང་བསྟུན་བོད་མི་དང་བོད་དོན་རྒྱབ་སྐྱོར་བ་གཙོས། རྒྱ་རིགས་དམངས་གཙོ་དོན་གཉེར་བ་དང་། ཡུ་གུར་བ། ཧོང་ཀོང་དང་ཐེ་ཝན་བཅས་ཀྱི་མི་མང་པོ་མཉམ་དུ་འཛོམས་ནས་ཨོསི་ཊརེ་ལི་ཡའི་གྲོས་ཚོགས་མདུན་དང་། ཡུལ་དེར་བཅའ་སྡོད་རྒྱ་ནག་གི་གཞུང་ཚབ་ཁང་གི་མདུན་བཅས་སུ་ངོ་རྒོལ་ལས་འགུལ་སྤེལ་ཡོད་པ་རེད།


གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།

བལྟ་བཤེར་མང་ཤོས་བྱས་པའི་གནས་ཚུལ།
RFA
སྲིད་སྐྱོང་མཆོག་གིས་བོད་དང་ས་འབྲེལ་ལ་དྭགས་བྱང་ཐང་རྒོད་ཡུལ་སོགས་སུ་འཚམས་གཟིགས་གནང་བཞིན་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
ཨ་མི་རི་ཀའི་བོད་དོན་ཆེད་ཁྲིམས་ཡིག་གཏན་འབེབས་གནང་བར་བོད་མི་ཚོས་དགའ་བསུ་དང་རྒྱ་ནག་གཞུང་གིས་སྐྱོན་བརྗོད་བྱས་འདུག
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎