ཨ་རིའི་ནང་གནས་སྡོད་བོད་མི་ཚོས་གངས་ལྗོངས་དཔལ་འབྱོར་ཞབས་ཞུ་ཁང་ལ་་ཨ་སྒོར་ས་ཡ་གཅིག་གི་མ་རྩ་འཛུགས་འཇོག་བྱས་ཡོད་འདུག

བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཁྱབ་འཆར་འགོད་པ་དཀོན་མཆོག་བརྩོན་འགྲུས་ལགས་དང་། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་རྡོར་ལགས་བདུན་ཕྲག་ལྔའི་རིང་ཨ་རི་དང་། ཁ་ན་ཊ་ཁུལ་གྱི་ས་གནས་མང་པོ་ཞིག་ནང་གཞུང་འབྲེལ་ཕྱོགས་ཕེབས་ཀྱིས་བོད་མི་ཚོར་གངས་ལྗོངས་དཔལ་འབྱོར་ཞབས་ཞུ་ཁང་དུ་མ་རྩ་འཛུགས་དགོས་པའི་སྐོར་དྲིལ་བསྒྲགས་ལས་དོན་སྤེལ་ཡོད་པ་རེད།

བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པ་ལྟར་ན་། བྱང་ཨ་རིའི་ཁུལ་ནས་གངས་ལྗོངས་དཔལ་འབྱོར་ཞབས་ཞུ་ཁང་དུ་མ་རྩ་འཛུགས་མཁན་མི་གྲངས་༥༥ཡིས་ཨ་སྒོར་ས་ཡ་གཅིག་གི་མ་རྩ་འཛུགས་འཇོག་བྱས་ཡོད་པ་དང་། བོད་མའི་སྤྱི་ཚོགས་ཡར་རྒྱས་ཐེབས་རྩ་བརྒྱུད་ཞལ་འདེབས་ཕུལ་མཁན་ཡང་བྱུང་ཡོད་འདུག གངས་ལྗོངས་དཔལ་འབྱོར་ཞབས་ཞུ་ཁང་གི་ངོས་ནས་བྱང་ཨ་རིའི་ཁུལ་ནས་ཨ་སྒོར་ས་ཡ་གཅིག་དང་ཁྲི་ལྔ་ཡི་མ་རྩ་མཁོ་སྒྲུབ་གནང་ཐུབ་པའི་རེ་བ་གནང་གི་ཡོད་འདུག

གངས་ལྗོངས་དཔལ་འབྱོར་ཞབས་ཞུ་ཁང་ནི། དངུལ་ཁང་མིན་པའི་དཔལ་འབྱོར་སྡེ་ཚན་ཞིག་ཡིན་ཞིང་། ཕྱི་ལོ་ ༢༠༡༧ ནས་བཟུང་ད་བར་ཁྱོན་བསྡོམས་ཨ་སྒོར་ས་ཡ་ ༤ དང འབུམ་ ༣ བུ་ལོན་གཡར་གནང་ཡོད་པ་དང་།  གངས་ལྗོངས་དཔལ་འབྱོར་ཞབས་ཞུ་ཁང་མ་འོངས་བར་དངུལ་ཁང་ཆུང་གྲས་ཞིག་ལ་དེབ་སྐྱེལ་བྱས་ནས་དངུལ་ཁང་གཞན་ནང་བཞིན་ལས་དོན་བྱེད་རྒྱུ་དེ་ཡིན་པ་རེད་།

གངས་ལྗོངས་དཔལ་འབྱོར་ཞབས་ཞུ་ཁང་གི་དགོས་དམིགས་གཙོ་བོ་ནི། བོད་མི་ཚོང་ལས་ཆེ་ཆུང་ཁག་ལ་དཔལ་འབྱོར་རོགས་རམ་གྱི་མཐུན་རྐྱེན་བསྐྲུན་རྒྱུ་དེ་ཡིན་འདུག