༄༅༎རྒྱ་ནག་གཞུང་ནས་བོད་ཐོག་ལ་བཙིར་གནོན་བྱེད་རྒྱུ་མཚམས་འཇོག་བྱེད་དགོས་པར་ཨ་རིའི་གྲོས་ཚོགས་འོག་མས་རྒྱ་ནག་ཕྱོགས་ལ་རེ་འདུན་བཏོན་གནང་ཡོད་པ་རེད་འདུག
དེའང་ད་རེས་སྤྱི་ཟླ་གསུམ་པའི་ཚེས་བཅུ་གཅིག་ཉིན་ཨ་རིའི་གྲོས་ཚོགས་འོག་མའི་གྲོས་གཞི་ཞིག་ལ་ཧ་ལམ་གྲོས་ཚོགས་ཚོགས་མི་ཚང་མའི་མང་མོས་འོས་ཤོག་གི་མོས་མཐུན་བྱུང་བའི་ཐོག་ནས་རྒྱ་ནག་གཞུང་ནས་བོད་ཐོག་བཙིར་གནོན་བྱེད་རྒྱུ་མཚམས་འཇོག་བྱེད་དགོས་པར་རྒྱ་ནག་ཕྱོགས་ལ་འབོད་སྐུལ་ཞུས་གནང་ཡོད་པ་རེད་འདུག་ལ་ད་རེས་ཀྱི་ཨ་རིའི་གྲོས་ཚོགས་འོག་མའི་གྲོས་གཞི་དེ་ནི་ནམ་ཞག་རྒྱུད་དུ་ནས་༸གོང་ས་མཆོག་དང་བོད་དོན་ལ་རྒྱབ་སྐྱོར་གནང་མཁན་ཨ་རིའི་གྲོས་ཚོགས་ཀྱི་ཚོགས་གཙོ་ནེན་སི་པེ་ལོ་སིས་ལ་སོགས་པའི་གྲོས་ཚོགས་ཚོགས་མི་ཁག་ཅིག་ནས་བཏོན་གནང་ཡོད་ཅིང་གོང་གསལ་གྲོས་གཞི་དེ་ལ་ཨ་རིའི་གྲོས་ཚོགས་འོག་མའི་གྲོས་ཚོགས་ཚོགས་མི་༤༢༢ནས་མོས་མཐུན་ཡོད་པའི་འོས་ཤོག་འཕེན་གནང་ཡོད་པ་དང་གྲོས་ཚོགས་ཚོགས་མི་དགུས་མོས་མཐུན་ཡོད་མེད་ཀྱི་འོས་ཤོག་འཕེན་མེད་ལ་དེ་མིན་གྲོས་ཚོགས་ཚོགས་མི་གཅིག་ནས་མོས་མཐུན་མེད་པའི་འོས་ཤོག་འཕེན་ཡོད། གཞན་ཡང་ད་རེས་ཨ་རིའི་གྲོས་ཚོགས་འོག་མའི་ནང་མང་མོས་ཀྱི་གྲོས་འཆམ་བྱུང་བའི་གྲོས་ཆོད་དེའི་ཐོག་རྒྱ་ནག་གཞུང་ནས་བོད་མིའི་ཐོག་ལ་བཙིར་གནོན་བྱེད་རྒྱུ་མཚམས་འཇོག་བྱེད་དགོས་པ་དང་བོད་མིའི་ཐོག་ལ་བཙན་འགེལ་བྱས་པའི་རྒྱ་གཞུང་གིས་དྲག་རྩུབ་ཆེ་བའི་ཉེན་རྟོག་པ་དེ་ཚོ་འཕྲལ་དུ་ཕྱིར་འཐེན་བྱ་དགོས་པ་མ་ཟད་ད་དུང་རྒྱ་ནག་གཞུང་ནས་༸གོང་ས་ཏཱ་ལའི་བླ་མ་མཆོག་དང་བཀའ་མོལ་གནང་རྒྱུ་སླར་གསོ་གནང་སྟེ་རྒྱུན་རིང་བོད་ཀྱི་དཀའ་རྙོག་དེ་སེལ་ཐུབ་པའི་ཐབས་ལམ་བཙལ་འཚོལ་བྱ་དགོས་པའི་འབོད་སྐུལ་ཡང་གནང་འདུག་ལ་དེ་དང་ཆབས་ཅིག་གྲོས་ཆོད་དེའི་ཐོག་རྒྱ་གར་ཕྱོགས་ནས་བཙན་བྱོལ་བོད་མི་ཁྲི་ཚོ་མང་པོར་སྡོད་གནས་ལ་སོགས་པའི་རོགས་རམ་མཁོ་འདོན་གནང་ཡོད་པ་དེ་ལ་བསྔགས་བརྗོད་ཡང་གནང་འདུག།