རྒྱ་གར་གྱི་རྡུལ་ཕྲན་ནུས་པའི་ཚོང་འབྲེལ་ལ་རྒྱབ་སྐྱོར།

༄༅༎རྒྱལ་སྤྱིའི་ཐོག་རྡུལ་ཕྲན་འཕྲུལ་རིག་དང་ནུས་ཤུགས་ཚོང་འབྲེལ་གྱི་སྒྲིག་གཞི་ནས་རྒྱ་གར་ལ་མུ་མཐུད་ཆག་ཡང་ཐོབ་ཆེད་རྒྱ་གར་གཞུང་གི་རྒྱལ་སྤྱིའི་ཡུལ་ཁག་གི་རྒྱབ་སྐྱོར་བསྐྲུན་ཐབས་ཀྱི་ལས་དོན་ལ་ཨ་རི་གཞུང་གིས་རྒྱབ་སྐྱོར་ཞུ་རྒྱུ་ཡིན་སྐོར་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་མཆོག་གིས་ནན་བརྗོད་གནང་བཞག་༎

བདུན་ཕྲག་སྔོན་མ་Nuclear Suppliers Groupའམ་རྡུལ་ཕྲན་ནུས་ཤུགས་མཁོ་འདོན་བྱ་མཁན་རྒྱལ་ཁབ་ཁག་ལས་གྲུབ་པའི་སྒྲིག་འཛུགས་ཀྱིས་རྡུལ་ཕྲན་གྱི་རྒྱུ་ཆ་ཡུ་རེ་ནིཡེམ་(Uranium)རྗས་འགྱུར་དང་རྫས་གཙང་བཟོའི་འཕྲུལ་རིག་ལག་རྩལ་ཚོང་འགྲེམས་བྱ་ཕྱོགས་ཐད་ལམ་སྟོན་གྱི་སྒྲིག་གཞི་དམ་དུ་བཏང་ཡོད་པ་རེད་ རྒྱ་གར་གཞུང་གིས་རྒྱལ་ཁབ་ནང་ནུས་ཤུགས་འདང་ངེས་མཁོ་སྒྲུབ་ཆེད་ཞི་བའི་རྡུལ་ཕྲན་ནུས་ཤུགས་མཁོ་འདོན་གྱི་ལས་འཆར་རྒྱ་ཆེ་འགོ་བཙུགས་བྱས་ཡོད་པ་མ་ཟད་༢༠༠༨ལོར་གོང་གསལ་རྡུལ་ཕྲན་ནུས་ཤུགས་མཁོ་འདོན་སྒྲིག་འཛུགས་ཀྱིས་རྡུལ་ཕྲན་མཚོན་ཆ་ཁྱབ་གདལ་་བཀག་སྡོམ་གྱི་རྒྱལ་སྤྱིའི་ཆིངས་ཡིག་ལ་ས་རྟགས་བཀོད་དགོས་པའི་ཆ་རྐྱེན་དང་དེ་བཞིན་རྡུལ་ཕྲན་གྱི་བཟོ་གྲ་ཁག་ལ་ལྟ་ཞིབ་ཀྱི་ཆ་རྐྱེན་བཅས་ནས་རྒྱ་གར་ལ་དམིགས་བསལ་ཆག་ཡང་བཏང་ཡོད་པ་རེད་ འོན་ཀྱང་ད་ཆ་རྡུལ་ཕྲན་ནུས་ཤུགས་མཁོ་འདོན་སྒྲིག་འཛུགས་ཀྱི་ལམ་སྟོན་གསར་པ་དེའི་བརྒྱུད་རྒྱ་གར་གྱི་ཕྱི་ཕྱོགས་ནས་རྡུལ་ཕྲན་གྱི་འཕྲུལ་རིག་མཁོ་སྒྲུབ་བྱ་རྒྱུར་འགོག་རྐྱེན་འཕྲད་སྲིད་པར་རྒྱ་གར་གཞུང་ལ་བློ་འཚབ་ཡོད་པར་བརྟེན་ཆ་རྐྱེན་གསར་པ་དེ་དག་ལས་མུ་མཐུད་ཆག་ཡང་འཐོབ་རྒྱུའི་འབད་བརྩོན་བྱེད་བཞིན་ཡོད་འདུག རེས་གཟའ་ལྷག་པའི་ཉིན་ར་ཤི་ཡ་དང་ཕེརན་སི་གཉིས་ནས་རྡུལ་ཕྲན་གྱི་སྒྲིག་གཞི་གསར་པ་ཡོད་མིན་ལ་མ་ལྟོས་པར་རྒྱ་གར་དང་རྡུལ་ཕྲན་ཚོང་འབྲེལ་མུ་མཐུད་བྱ་རྒྱུ་ཡིན་སྐོར་གསལ་འདོན་གནང་ཡོད་པ་དང་ དེ་རིང་ཨ་རི་གཞུང་གིས་ཀྱང་དེ་དང་གཅིག་མཚུངས་རྒྱབ་སྐྱོར་ནན་བརྗོད་བྱས་ཡོད་པ་རེད༎