Ялған бәрибир ялған

Мәсилән, хитай мустәмликичилири, 57 йил бурун уйғурларға өзини башқуридиған район қуруп бәргән иди. Лекин таки һазирғичә, уйғурлар бир күнму өзини өзи башқуруп баққини йоқ. ялғанни үч қетим тәкрарлиса растқа айлиниду, дегән сөз бойичә пикир қилсақ, хитай ялғанни 57 йил тәкрарлиған болсиму, уйғурларниң өзини өзи башқуруши техичә растқа айланмиди.

Әмәлийәттә еғиздин чиққан һәр қандақ бир сөз йошурун яки ашкара мәқсәтни ишқа ашурушни нишан қилиду. Тәңритағ тори 9‏-айниң 25‏-күни “шинҗаң қәшқәрдә наһайити зор көләмдә су мәнбәси байқалди” мавзулуқ хәвәр елан қилди. Бу хәвәр растму яки ялғанму? “милйон кишиләрни су билән тәминләшкә болиду... Бу су дәсләпки қәдәмдә байқалған имиш...Шинҗаңға ярдәм қилиш пилани йолға қоюлғандин кейин, қәшқәр алаһидә мәмури район қилинип тәстиқланған имиш...Байқалған су мәнбии һәр күни 3 йүз 10миң 410 күп метир су билән аһалиләрни тәминләр имиш...Вәһаказа.” һәммиси ялған.

Йәр асти сүйи! йәр астида көл бармикинә?! уйғурниң ата-бовилири бу көлни немишқа байқимиған болғиди. Әгәр бир аһалә, бир хәлқ су кәмчил болуп йәр астидин су тартишқа бағлинип қалидиған болса, бу хәлқ қайси күнгә қалған болиду. Әгәр хитайдәк бир һөкүмран милләт аһалә көчүрүш еһтияҗи түпәйли, қәдимий хәлқ уйғурлар олтурақлашқан уйғуристанниң қәшқәр юртиға аһалә көчүрүш нийитидә, йәр астидин көп мәнбәлик су чиқти дәп, ялған сөзләйдиған болса, бу ялғанни үч күн сөзлисиму, үч ай сөзлисиму растқа айландуралмайду. Ундақта хитай миллий һөкүмранлири йәнә немә қувлуқ-шумлуқни йолға селиши мумкин?! қәшқәргә хитай көчүрүш, уйғурниң қәдимий вә сәлтәнәтлик мәдәнийитини йоқитиш, қәшқәр арқилиқ таҗикистанға, афғанистанға аста-аста сиңип кириш вә оттура асия түзләңликини тәсир даирисигә еливелиш үчүнла, хитай мустәмликичилири қәшқәргә аһалә көчүрмәкчи. Әйни чағда сталинниң ярдими арқилиқ уйғуристанни бойсундурған хитай мустәмликичилири, әмдиликтә уйғуристанниң қәшқәр өлкисини мәдәнийәт җәһәттә бойсундурмақчи болди.

Қериндашлиримиз билиши керәк идики, хитай мустәмликичилири ғулҗини база қилип қазақистанға, қәшқәрни база қилип таҗикистанға, өзбекистанға сиңип кирмәкчи болуватиду вә сиңип кирди. Хитайниң қәшқәрдин су тепилди дегән тәшвиқати қәшқәргә хитай көчмәнлирини милйонлап көчүрүшни мәқсәт қилиду. Қәшқәр арқилиқ оттура асияға кеңийиш-бу сиясәт, хитай көчмәнлириниң ахирқи нишанидур.