28 ‏- январ шаяр тоқунуши

Шаяр наһийисиниң шаяр базиридики бир електронлуқ оюнчуқханида, 28 ‏ - январ күни кәчтә уйғур яшлири билән хитайлар арисида тоқунуш чиққан.
Мухбиримиз шөһрәт һошур
2009.01.30
Share on WhatsApp
Share on WhatsApp
Uyghurlarni-tutqun-qilish-305 Шәндуң университетида оқуватқан бир нәччә уйғур оқуғучиларниң, чиңдав шәһиридики мәлум хитай сақчи даирилири тәрипидин қаттиқ урулуп арқидин тутқун қилинған көрүнүш.
Сүрәт boxun.com Тор бетидин елинди. Нәшрийат һоқуқи boxun.com Ниң.

Тоқунушта, 3 нәпәр уйғур яш, оюнчуқханиниң хитай саһиби вә униң достлири тәрипидин қаттиқ уруп яриландурулған, бир нәпири өлтүрүветилгән. Вәқәгә шаһид болған уйғурлар наразилиқ билдүрүп, електронлуқ оюнчуқханини қоршивелип сақчилар вә вәқә туғдурғучиларға наразилиқ билдүргән.

Бу вәқә һәққидә қисқа хәвәр бәргән бир уйғур тор бети, шу күни шаярда бирнәччә йүз кишилик намайиш болғанлиқини билдүргән иди. Биз әһвал игиләп сақчи даирилиригә телефон қилғинимизда, дәсләптә улар вәқәниң йүз бәргәнликини рәт қилди.

Арқидин наһийилик сақчи идарисиға телефон қилғинимизда, вәқәниң йүз бәргәнликини, әмма һазирчә ашкарилашқа болмайдиғанлиқини билдүрди. Наһийилик сода - санаәт мәмури башқуруш идарисидики бир хадим вәқәниң йүз бәргәнликини, идарә рәһбәрлириниң вәқәни давамлиқ ениқлаватқанлиқини билдүрди.

Шаяр наһийилик дохтурханиниң җиддий қутқузуш бөлүмигә телефон қилғинимизда, яридарлардин бириниң сираҗидин исимлик яш икәнлики, һазир еғир дәриҗидә яридар икәнлики мәлум болди. яридарға қараватқан бир уйғур вәқәдә өлгүчидин хәвири йоқлуқини билдүрди.

Интернеттә тарқалған хәвәрләрдә сақчиларниң, вәқәгә наразилиқ билдүргән уйғурларни тутқун қилғанлиқини, әмма вәқә туғдурған хитайларни тутмиғанлиқини билдүргән иди; бу әһвал бир сақчиниң сөзлиридинму мәлум болди.

Яридарға қараватқан киши вәқә туғдурған хитайларниңму һәм уйғурларниңму тутулғанлиқини вә сорақ қилиниватқанлиқини билдүрди.

Һөрмәтлик оқурмәнләр, вәқәниң тәпсилати һәққидә давамлиқ мәлумат беришкә тиришимиз.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.