Xitay hökümiti ramizan mezgilidiki diniy bashqurushini kücheytmekte

Atush sheherlik radi'o - téléwiziye idarisi uqturush élan qilip, ramizan éyida jem'iyet muqimliqi xizmitini aktipliq bilen ijra qilish kéreklikini otturigha qoyghan we ramizan éyida diqqet qilishqa tégishlik mesililerni öz ichige alghan ikki türlük tüzümni békitken.
Muxbirimiz eqide
2010-08-19
Share
Heytgah-Namaz-305.jpg Héytgah meschitide namaz oquwatqan uyghurlar.
AFP Photo

Xitay da'irilirining ramizan éyida muqimliqni saqlash xizmitini kücheytish teshwiqati netijiside, Uyghur diyarining herqaysi wilayet, sheher, nahiye we yéza, kentlirigiche ramizan mezgilide yolgha qoyulghan tüzüm ‏ - belgilimiler qattiq qolluq bilen ijra qilinmaqta.

Radi'omiz ötken hepte aqsu wilayiti ma'arip idarisining kucha nahiyiside mektep oqughuchilirini roza tutmasliqqa mejburlap, hetta ularni tamaqlandurush arqiliq rozi tutqan - tutmighanliqini sinighanliqi, ramizan éyida milly alahidiliki qoyuq tüs alghan kiyim - kécheklerni kiygüchiler we saqal - burut qoyghanlarni jazalaydighanliqi toghrisidiki melumatlargha érishken iduq.

Bügün, atush sheherlik radi'o ‏ - téléwiziye idarisining ramizan éyi munasiwiti bilen élan qilghan uqturushini qolgha chüshürduq.

Uqturushta, mundaq ikki xil tüzüm békitilgen:

1. Ramizan éyi mezgilide nöwetchilik we charlash xizmitini yaxshi ishlesh. Idare xizmetchilirini rehberlikning yétekchiliki astida her küni 24 sa'et toluq halda nöwetchilik qilishqa belgilesh, mesile bayqalghan haman derhal, bix halitide bir terep qilish.

2. Idare xizmetchilirige qaritilghan bashqurush tüzümini kücheytip, partiye ezaliri we a'ile tawabi'atlirining shuningdek ularning perzentlirining roza tutushini qattiq cheklesh, ularning meschitlerge kirip namaz oqup, ibadet qilishini cheklesh, aldin élip bérishqa tégishlik teyyarliq xizmetlirini yaxshi ishlep, eger tüzümge xilapliq qilghuchilar bayqalsa, qattiq bir terep qilish, omumen ramizan éyi dawamida muqimliqni qolgha keltürüsh xizmetlirini teltöküs we toluq élip bérishqa kapaletlik qilish.

Atush sheherlik radi'o ‏ - téléwiziye idarisi yolgha qoyghan tüzümlerning ijra qilinish ehwali heqqide melumat élish üchün, biz uqturushta tekitlen'gen mezmunlargha asasen, atush sheherlik xeliq ishlar idarisi, atush sheherlik birliksep bölümi, bext yoli ahaliler komitéti qatarliq orunlargha téléfun urduq. Bu orunlardin téléfonimizgha jawab béridighan adem chiqmidi.

Atush sheherlik saqchi idarisidiki saqchi bizning erkin asiya radi'osidin téléfun urghanliqimizdin xewer tapqandin kéyin, xuddi so'alimizgha jawab béridighandek keypiyat bilen bizge "yaxshimusiz" dep jawab qayturdi, biraq so'alimizni anglighandin kéyin, derhal téléfonni üzüwetti.

Biz yene atush shehiridiki réstoran, ashxanilargha téléfun urup ramizan éyida mulazimet qilish ehwallirini bilmekchi bolduq. "Enjür" we "méhriban" réstoranlirigha téléfun urghan bolsaqmu téléfonimizgha héchkim jawab bermidi.

Köpligen réstoran we ashxanilargha téléfun urup, atushtiki melum bir téz tamaqxanisining igisini ziyaret qilish pursitige ige bolduq.

Tamaqxana igisi öz bixeterlikini közde tutup, bizge ramizan éyi belgilimisi boyiche tamaqxanini mejburiy achqanliqi heqqide éniq melumat bermidi we toxtam arqiliq normal mulazimet élip bériwatqanliqini, héchqandaq mejburlashqa uchrimighanliqini bildürdi.

Xizmiti yoq bir kishini ziyaret qilduq, u özining we pütün a'ilisidikilerning roza tutuwatqanliqini bildürdi.

Amérikidiki diniy zat gheyret hajim, Uyghurlarning elmisaqtin tartip diniy pa'aliyetlerni pütün shert - eqidilirige uyghun halda izchil türde dawamlashturup kéliwatqanliqini, bésim qanche küchlük bolsa, qarshiliq bildürüshningmu shunche küchlük bolidighanliqini, xitay hökümitining diniy siyasitining emelge ashmaydighanliqini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet