Norwégiyidiki Uyghurlar sen'et konsérti ötküzdi

16-Iyun küni norwégiyidiki Uyghur sen'et guruppisi paytext osloning kolbotin kommuna oppégord medeniyet mektipining teklip qilishi bilen sen'et pa'aliyiti ötküzdi.
Ixtiyariy muxbirimiz aygül yüsüp
2011.06.16
Share on WhatsApp
Share on WhatsApp
norwigiye-senet-paaliyiti-305.jpg Norwégiyidiki Uyghur sen'et guruppisi paytext osloning kolbotin kommuna oppégord medeniyet mektipining teklip qilishi bilen sen'et pa'aliyiti ötküzdi. 2011-Yili 16-iyun.
RFA/Aygul

Bu qétimqi konsértqa norwig, Uyghur we bashqa millet kishiliridin jem'iy yüzge yéqin kishi qatnashti.

Konsért bashlinishtin burun sen'et guruppisi ezaliridin biri bolghan kichik qiz méhribanu tamashibinlargha norwig tilida Uyghurlarning tarixi, medeniyiti we hazirqi siyasiy, ijtima'iy ehwalini qisqiche tonushturup ötti.

Konsértta shox Uyghurche naxsha-muzika, usul orundalghandin bashqa pi'anino bilen orundalghan teqdir muzikisi hemde ghéjek we pi'anino bilen bilen chélin'ghan donay deryasi namliq muzika tamashibinlarni hayajan'gha keltürdi.

Oppégord medeniyet mektipining mes'uli nina knarwik xanim sherqiy türkistan dégen isimni intayin chirayliq tilgha élip turup, özining Uyghurlarni we sherqiy türkistanni bu mektepte til praktikisi qilip ishlewatqan dilshat ependi arqiliq tonughanliqini, bügün orundalghan Uyghurche naxsha-muzikini intayin yaxshi körgenlikini, Uyghurlarning milliyche sen'et kiyimlirining intayin chirayliq ikenlikini ipade qilip ötti. U muxbirning Uyghurlar bilen xitaylarning qandaq medeniyet perqining barliqini hés qildingiz dégen so'aligha, elwette bir millet öz musteqilliqini yoqatqanda bashqa milletning ismi bilen atilip qalidu. Bu intayin échinishliq ehwal, lékin men silerning naxsha-usul medeniyitinglar arqiliq silerning xitaygha tamamen oxshimaydighan ésil bir medeniyetlik millet ikenlikinglarni chüshendim dep jawab berdi.

Naxsha-muzika arqiliq Uyghurning ésil medeniyitini bashqa milletlerge tonushturushni asasliq meqset qilghan Uyghur sen'et guruppisining yétekchisi möminjan ependi, bu pa'aliyetni orunlashturulushqa alahide küch qoshqan dilshat we chet'el muzikilirini Uyghurlarning en'eniwi chalghu eswabliri bilen orunlap anglitishni Uyghur sen'itini chet'elliklerge tonushturushning yene bir usuli dep qarighan yashar ependi qatarliqlar bu qétimqi oyun qoyush pa'aliyiti heqqide toxtaldi.

Chüsh sa'et 12 din taki birdin ashquche dawam qilghan bu Uyghurche sen'et konsérti artislarning shox chatma naxshiliri we tamashibinlarning usulliri bilen alqish sadaliri ichide intayin muweppeqiyetlik axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.