Gérmaniye Uyghur ayallar komitéti herxil telim-terbiye kurslirini qanat yaydurmaqta

4-Ayning 10-küni gérmaniye Uyghur ayallar komitéti d u q zalida diniy telim‏-terbiye kursini resmiy bashlidi. Kursqa myunxén shehiridiki bir qisim ayallar ishtirak qildi. D u q diniy ishlar komitétining mudiri turghunjan alawudun ependi deslepki derste islam eqidiliridin asasi bilimlerni sözlep, Uyghur xanim-qizlirigha diniy eqide terbiyisi élip bardi.

Gérmaniye Uyghur ayalliri komitéti aldinqi aydin bashlap yene gérman tili kursini yolgha qoyghan bolup, bu kursqimu köpligen Uyghur xanim-qizliri qatnashqan.

Gérmaniye Uyghur ayalliri komitétining re'isi gülnar xanim bu toghrisida toxtilip, ayallar komitéti yolgha qoyuwatqan bu pa'aliyetlerning alqishqa érishiwatqanliqini tilgha aldi.

Bu qétim yéngidin yolgha qoyulghan diniy telim-terbiye kursi heqqide toxtalghan gülnar xanim, balilarni terbiyileshtek ulugh bir wezipini üstige alghan xanim-qizlarning aldi bilen özlirini terbiyilishi zörürlükini tekitlidi.

2009-Yilidiki 5-iyul weqesidin kéyin yurtida turush imkani bolmay, yéqinda öz wetinidin qéchip chiqip gérmaniyining myunxén shehirige kélip siyasiy panahliq tiligen gülnihal xanim özining bu kursqa qatnashqanliqidin köp memnun bolghanliqini bildürüp ötti. U xitay bésimi astidiki Uyghur wetini bilen erkin, démokratik gérmaniyini sélishturup, wetende diniy telim-terbiye élish uyaqta tursun, namaz oqushningmu qéyinliqini, bu yerde bolsa insanlar öz eqide-étiqadigha xalighanche sadaqet körsitip yashiyalaydighanliqini bildürüp ötti.

Gérmaniye ayallar komitéti 2010-yili 3-ayda qurulghan. Bu teshkilat öz prinsipida gérmaniyidiki Uyghur yash-ösmürlirige öz ana tilini, dinini, medeniyitini, tarixini, Uyghur sen'itini ögitishni asasi wezipe qilghandin tashqiri, gérmaniye qanunidin we xelq'aradiki munasiwetlik qanunlardin paydilinip Uyghur ayallirining ijtima'iy, siyasiy sapasini östürüshnimu muhim bir wezipe qilghan. Wetende oqushsiz qalghan balilargha we iqtisadiy qiyinchiliq seweblik dawalinalmaywatqan ayallar hem balilargha yardem qilishni bir mejburiyet qilghan. Bu jehette ilgiriki aylarda myunxén ayalliridin i'ane toplap, weten'ge yollap bergen.

Gülnar xanimning bildürüshiche, bundin kéyinki aylarda yene, herxil éhtiyajliq kurslarni dawamliq yolgha qoyup, Uyghur ayallirining qiyinchiliqlirini azaytishqa yar-yölekte bolidiken.