Америка һөкүмити йәнә үч хитай ширкитини “қара тизимлик” кә алди

Вашингтондин мухбиримиз әзиз тәйярлиди
2023.09.26

“вал ситрет журнили” ниң 25-сентәбирдики хәвиридә ейтилишичә, америка сода министирлиқи шу күни йәнә үч хитай ширкитини уйғур мәҗбурий әмгикигә бағлинишлиқ болғанлиқи үчүн “қара тизимлик” кә алған. Бу америка һөкүмити “уйғур мәҗбурий әмгикиниң алдини елиш қануни” ни иҗра қилишқа башлиғандин буян улар вуҗудқа чиқарған йәнә бир әмәлий қәдәм болуш сүпити билән һәр саһәниң, шуниңдәк муһаҗирәттики уйғур җамаитиниң алқишиға сазавәр болди.

Ройтерс агентлиқиниң бу һәқтики хәвиридә ейтилишичә, бу қетим америка һөкүмити “шинҗаң тйәнмйән тоқумичилиқ ширкити” , “шинҗаң тәңритағ юң тоқумичилиқ ширкити” вә “шинҗаң җуңтәй гуруһи” қатарлиқ үч ширкәтни рәсмий һалда қара тизимликкә алған. Шуниңдәк, уларниң тәминат зәнҗиригә четишлиқ таварларниң америка таможнисидин өтүшини мәни қилған.

Мәлум болушичә, бу үч ширкәт америка һөкүмити “дөлитимизниң хәвпсизлик ишлириға хәтәр елип келиду” дегән йәкүн асасида мәни қилған 28 чәтәл ширкити қатаридин орун алған. Америка сода министирлиқиниң ярдәмчи министири сея розман (Thea D. Rozman) Бу һәқтә сөз қилип “бу һәрикитимиз нөвәттә дөлитимизниң експорт чәклимилиригә бузғунчилиқ қилмақчи болғанлар, шуниңдәк русийәниң таҗавузиға янтаяқ болуватқанлар үчүн очуқ агаһландуруш” дегән.

Уйғурларни мәҗбурий әмгәккә селиш уйғур дияридики қирғинчилиқниң йәнә бир муһим шәкли болуп, йеқинқи йилларда лагер тутқунлириниң көп қисми биңтүән башқурушидики һәрқайси завут вә фабрикиларға әрзан баһалиқ “заманиви қуллар” сүпитидә йөткиливатқанлиқи, йәнә зор сандики уйғур ишчиларниң хитай өлкилиригә тошулуватқанлиқи мәлум болған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.