Чәтәлләрдики хитай демократлири “4-июн вәқәси” ни хатирилиди

Мухбиримиз үмидвар
2017.06.04
Share on WhatsApp
Share on WhatsApp

1989-Йили, 4-июн күни, бейҗиң тйәнәнмен оқуғучилар һәрикитиниң бастурулушиниң 28 йиллиқи мунасивити билән америка қошма штатлири вә башқа бир қисим әлләрдики хитай демократлири мәзкур вәқә қурбанлирини түрлүк шәкилдә хатирилиди.

Радиомиз хитай тили бөлүминиң хәвәр қилишичә, америкадики кишилик һоқуқ тәшкилати“пуқралар һоқуқи” атақлиқ демократик өктичи зат яң җйәнлиниң башчилиқида 3-июн күни ахшамдин 4-июн сәһәргичә америка пайтәхти вашингтон шәһиридә мәхсус 4-июн вәқәсини хатириләш сөһбәт йиғини ачқан вә тйәнәнмен қурбанлириға тәзийә билдүргән.

Шу күни йәнә американиң сан-франсиско шәһиридики хитай аһалиси бу йәрдики хитай консулханисиға алдида компартийәниң оқуғучилар һәрикитини бастурушиға аит сүрәт көргәзмә паалийити өткүзгән.

6-Айниң 3-күни кечидә хитайниң вашингтон шәһиригә җайлашқан баш әлчиханисиниң алдида бир қисим хитай демократийә һәрикәт әзалири шам йеқиш паалийити өткүзүп вә нутуқ сөзләп, 4-июн вәқәсини хатирилигән шуниңдәк ши җинпиң һөкүмитидин тйәнәнмен оқуғучилар һәрикитини ақлаш пикирлирини оттуриға қойған. Мундақ шам йеқиш арқилиқ 4-июн қурбанлирини хатириләш хоңкоңдиму өткүзүлгән.

Уйғур кишилик һоқуқ қурулушиму “4-июн вәқәси” ниң 28 йиллиқиға атап мәхсус баянат елан қилип, вәқә қурбанлириға болған һесдашлиқи, хитай компартийәсиниң демократийә тәләп қилип, тинч намайиш қилған оқуғучиларни бастурғанлиқини тәнқид қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.