Уйғурлар дияридики 5G қурулушиға икки милярд сом мәбләғ селинмақчи
2020.06.09
Хитай һөкүмити йеқиндин буян зор күч билән кеңәйтиватқан 5G қурулуши уйғурлар дияридиму тездин омумлишиватқан болуп, буниңға җәмий икки милярд сом (тәхминән 300 милйон америка доллири) мәбләғ аҗритидиғанлиқини җакарлиған.
Шинхуа агентлиқиниң 8-июндики хәвиридә ейтилишичә, хитай һөкүмити 5G тор қурулушиға лазимлиқ алақә мунарлирини җиддий кеңәйтиватқан болуп, бу қурулуш тамамланғанда уйғурлар дияридики мунарларниң җәмий сани бәш миңға йеқинлишидикән. Хәвәрдә ейтилишичә, 5G тори үчүн керәклик алақә мунариниң ток сәрпияти бәкла юқири болсиму хитай һөкүмити буниңға лазимлиқ ток мәнбәсигә капаләтлик қилидиғанлиқини тәкитләп кәлмәктикән.
Нөвәттә уйғур дияриниң исми-җисмиға лайиқ сақчи дөлитигә айлинип қалғанлиқи дуняға мәлумлуқ сават һесаблинидиған болуп, буниңда хитай һөкүмитиниң һазирқи заман юқири пән-техникисини уйғурларни назарәт қилиш вә лагерларға қамашқа тәтбиқлиши хәлқараниң күчлүк тәнқидигә учрап кәлгәниди.
Хитай һөкүмитиниң бу қурулушқа бунчә көп мәбләғ селишиға қарита өз гуманлирини ипадилигән мустәқил көзәткүчи елшат һәсән бу һәқтә тохтилип: “хитай һөкүмити һечқачан уйғурларға пайдилиқ бирәр қурулушқа бунчә көп мәбләғ салған әмәс. Шүбһисизки бу қетимлиқ қурулуш нөвәттики сақчи дөлити механизми вә уйғурларға болған контроллуқни техиму мукәммәлләштүрүш үчүн хизмәт қилиду” деди.