ئامېرىكا پرېزىدېنتى دونالد ترامپ بىلەن رۇسىيە پرېزىدېنتى ۋلادىمىر پۇتىن دۈشەنبە كۈنى فىنلاندىيە پايتەختى ھېلسىنكىدا ئۇچرىشىپ، ئىككى تەرەپ مۇناسىۋىتىنى ئۆزگەرتىشكە كېلىشكەنلىكىنى ئېلان قىلدى.
پرېزىدېنت ترامپ پۇتىن بىلەن ئۆتكۈزگەن ئاخبارات يىغىنىدا، ئامېرىكا-رۇسىيە مۇناسىۋەتلىرىنىڭ ھېچقاچان ھازىرقىدەك ناچارلىشىپ باقمىغانلىقى، ھەر ئىككى تەرەپنىڭ خاتالىق ئۆتكۈزگەنلىكى، بىراق بۇ ئەھۋالنىڭ ھازىر ئۆزگەرگەنلىكىنى جاكارلىدى.
خەلقئارا ئانالىزچىلارنىڭ ئىلگىرى سۈرۈشىچە، رۇسىيە-ئامېرىكا مۇناسىۋەتلىرىدىكى ئۆزگىرىش رۇسىيە-خىتاي مۇناسىۋەتلىرىنى تەۋرىتىپ قويىدىكەن. دۈشەنبە كۈنى ئامېرىكىدىكى «كونسېرىۋاتىپ ئامېرىكا» تورىدا ئېلان قىلىنغان بىر ماقالىدا، ئامېرىكا بىلەن رۇسىيەنىڭ خىتايغا قارشى ئىتتىپاقلىشىۋاتقانلىقى ئىلگىرى سۈرۈلدى.
ئامېرىكىدىكى ئاقىللار ئامبىرى - «دۆلەت مەنپەئەتى مەركىزى» مۇداپىئە پروگراممىسىنىڭ دىرېكتورى خارىي كازىئانىس قەلەمگە ئالغان ماقالىدا، ئامېرىكا بىلەن رۇسىيەنىڭ خىتايغا قارشى ئىتتىپاقلىشىشىغا يېتەرلىك سەۋەبلەرنىڭ بارلىقى ئەسكەرتىلىپ، «رۇسىيە بىلەن ئامېرىكا بىر-بىرى بىلەن دۈشمەنلىشىپ مېڭىۋەرسە، خىتاي ئىقتىسادىنىڭ بىر كۈنى ئامېرىكا بىلەن رۇسىيەنىڭ يىغىندىسىدىن ئېشىپ كېتىدىغانلىقى، ئىقتىسادى كۈچ ھەربىي كۈچكە ئايلانسا قانداق ئىشلارنىڭ يۈز بېرىدىغانلىقى ھەممىگە مەلۇم ئىكەنلىكىنى تەكىتلىگەن.
كۆزەتكۈچىلەرنىڭ بىلدۈرۈشىچە، ئامېرىكا-رۇسىيە مۇناسىۋىتىنىڭ ئۆزگىرىشى ۋە بۇ ھەقتىكى ئانالىزلار خىتاينى بىئارام قىلىشقا باشلىغان. خىتاي تاشقى ئىشلا مىنىستىرلىقى باياناتچىسى خۋا چۈنيىڭ سەيشەنبە كۈنى بۇنىڭغا ئىنكاس بىلدۈرۈپ، خىتاينىڭ «خىتاي-رۇسىيە ئىستراتېگىيەلىك شېرىكلىك مۇناسىۋىتىگە بولغان ئىشەنچى كامىل.
خىتاي-رۇسىيە مۇناسىۋەتلىرى ھەرقانداق تاشقى ئامىلنىڭ تەسىرىگە ئۇچرىمايدۇ» دېگەن. لېكىن خارىي كازىئانىسنىڭ ئىلگىرى سۈرۈشىچە، ھازىر رۇسىيە خىتاي بىلەن دوستەك قىلسىمۇ، لېكىن كەلگۈسىدە ئۇ خىتاينىڭ بىر يول بىر بەلۋاغ پىلانى، قورال-ياراق رىقابىتى ۋە زېمىن مەسىلىلىرىدە جىددىي خىرىسىغا دۇچ كېلىدىكەن.
