Xitay amérikidin teywen prézidéntining amérikida toxtap ötüshige yol qoymasliqini ümid qildi

Muxbirimiz erkin
2016.12.30

Xitay hökümiti jüme küni bayanat élan qilip, amérikidin teywen prézidénti sey yingwénning amérikida toxtap ötüshige yol qoymasliqini telep qilghan. Teywen prézidénti sey yingwén kéler yili 1-ayda ottura amérikidiki gu'atimala, honduras, salwador, nikaragu'a qatarliq teywen bilen diplomatik munasiwiti bar 4 döletni ziyaret qilidu. U seper üstide amérikining san-fransésko we xyuston sheherliride toxtap ötüshni qarar qilghan.

Uning qarari xitay hökümitini qattiq bi'aram qilghan. Roytérs agéntliqining xewer qilishiche, xitay tashqi ishlar ministirliqi bayanatida,“Xitay terep amérikining bir xitay siyasiti, xitay-amérika 3 qoshma axbaratigha emel qilip, teywen rehbirining chégradin ötüshige yol qoymasliqini, ‛teywen musteqilliq küchliri‚ ge xata signal bermeslikini, emeliy herikiti arqiliq xitay-amérika munasiwitining omumiy weziyiti we teywen boghuzining tinchliqi, muqimliqini qoghdishini ümid qilidu” déyilgen.

Amérikining yéngi saylan'ghan prézidénti donald tramp yéqinda, awwalqi amérika prézidéntlirining diplomatik en'enisini buzup tashlap, teywen prézidénti sey yingwén bilen téléfonda sözleshken. Emma bu xitay da'irilirini qattiq bi'aram qilghan idi.

Xitay tashqi ishlar ministirliqi trampning teywen siyasitidin qattiq endishe qiliwatqanliqini bildürgen. Emma tramp özining sey yingwén bilen sözleshkenlikini aqlap, “Xitay jenubiy déngizda aral yasighan, iqtisadi wasitilerni qollinip amérikigha ziyan salghanda bizdin sorighanmu?” dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.