Amérika qoral sétiwélish we tetqiq qilish xamchotini ashurmaqchi iken

Xitayning künséri küchiyiwatqan herbiy tehditige taqabil turush  we ukra'inagha yardem bérishni dawamlashturush üchün amérika hökümiti amérika dölet mudapiyesige ajritidighan xamchotini östürmekchi bolghan.

“Blombérg xewerliri” torining xewer bérishiche, amérika prézidénti jow baydén 3-ayning 9-küni amérikaning tinchliq dewridiki eng köp herbiy xamchotini élan qilidiken. Bu xamchotning ichide 170 milyard dollar qoral sétiwélishqa, 145 milyard dollar herbiy qoral tetqiqatigha ishlitilidiken.

Xewerde éytilishiche, ukra'inagha qoral toshuwatqan amérikaning herbiy xirajiti éship ketken, shundaqtimu amérika zéliniskigha yardem qilip rusiyeni ukra'inadin qoghlap chiqirish üchün ayrim meblegh ajratqan. Yéngidin élan qilinidighan xamchot bolsa asasen xitayning herbiy tehditige taqabil turushqa ishlitilidiken.

Amérika dölet mudapiye ministirliki amérikadiki herbiy sana'et karxaniliridin sétiwalidighan hemde iqtidarini ashurushqa meblegh salidighan qorallar asasen yéngi tiptiki F-35 küreshchi ayropilani, qit'eler ara hujum qilidighan bashqurulidighan bomba, xitayning yoshurun hujumigha taqabil turushqa kéreklik yiraq musapiliq bomba qatarliqlarni öz ichige alidiken.