Гина раймондо: “хитайниң америка юқири техникилиқ өзәклиригә еришишигә һәргиз йол қоймаймиз”

Вашингтондин мухбиримиз әркин тәйярлиди
2023.12.05

Америка сода министири гина раймондо 2-декабир калифорнийәдики роналд реган фондиниң реган мудапиә мунбири йиғинида нутуқ сөзләп, хитайниң америка юқири техникилиқ өзәклиригә еришишигә һәргиз йол қоймайдиғанлиқини билдүргән. Гина раймондониң ейтишичә, “американиң дөләт хәвпсизлики униң вақитлиқ еришкән пайдисидин муһим” икән. Гина раймондо реган мудапиә мунбири йиғинида америка карханичилириға нутуқ сөзлигән. У мундақ дегән: “биз хитайниң бу хил өзәкләргә еришишигә йол қоялмаймиз. Бизниң униң буларға игә болушиға йол қоюшимиз мумкин әмәс. Биз уларниң буниңға игә болушиға йол қоялмаймиз. Шуңа, биз уларниң бизниң әң назук техникилиримизға еришишини рәт қилимиз.”

Гина раймондониң буниңдин икки һәптә аввал пирезидент байден сан-франсискода хитай рәиси ши җинпиң билән көрүшүп, икки тәрәпниң һәрбий алақини өз ичигә алған бәзи саһәләрдә пикир бирлики һасил қилишиниң арқисидин бу сөзләрни қилиши, диққәт қозғиди. Гина раймондониң ейтишичә, америка сода министирлиқиниң санаәт вә бихәтәрлик идариси юқири техникилиқ өзәкләрниң експортини контрол қилишта техиму көп селинмиға еһтияҗлиқ икән. Раймондо йәнә америка ширкәтлириниң америка дөләт хәвпсизлик мәнпәәтигә уйғунлишиши керәкликини тәкитлигән.

Униң көрситишичә, хитай билән болған алақә икки дөләт мунасивитиниң муқимлиқиға пайдилиқ болсиму, лекин дөләт хәвпсизлики мәсилисидә тәһдиткә қарита (америка) көзини йоған ечиши керәк” икән. Раймондо “бу биз һазирға қәдәр дуч кәлгән әң чоң хәвп, биз буниңға тақабил турушимиз керәк” дегән.

Гина раймондо 4-декабир күни америка CNBC қанилиниң зияритини қобул қилғандиму әң чоң тәһдитниң хитайдин келиватқанлиқи вә давамлиқ күчийиватқанлиқини ейтқан. Һалбуки, хитай ташқи ишлар министирлиқиниң баянатчиси ваң венбин гина раймондониң сөзлирини әлгәк билән тосма ясашқа охшитип, америка “һәрқанчә тиришсиму, су бәрибир әлгәктин өтүп уз йолида ақиду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.