Америка һөкүмити рәсмий түрдә америка-хитай сода урушиға бәл бағлиди

Мухбиримиз әзиз
2018-08-03
Елхәт
Пикир
Share
Принт

Америка билән хитай оттурисидики сода урушиниң қиқас-сүрәнлири тохтимайватқанда америка һөкүмити өзиниң бу «ис-түтәксиз уруш» қа рәсмий тәйярлиқ қиливатқанлиқини көрситишкә башлиди. Бирләшмә агентлиқниң 3-авғусттики хәвиридә ейтилишичә, хитай билән болған бу қетимлиқ рәһимсиз сода урушида өзини күчләндүрүш үчүн америка һазир достлири билән болған мунасивәтни йеңиваштин оңшимақта икән.

2‏- Вә 3-‏авғуст күнлири америка билән мексика тәрәпниң вәкиллири вашингтон шәһиридә «шималий америка әркин сода келишими» ни йеңиваштин йезип чиқиш билән алдираш болған. Бу келишимни қайта йезип чиқиш ишиға канада һөкүмитиму иштирак қилидикән. Мәлум болушичә, буниңдин бирнәччә ай бурун бу келишимниң сүрүки тошуп кәткән икән. Өткән һәптә болса ақ сарай явропа иттипақи билән болған аптомобил вә запчасларға мунасивәтлик содида көрүлгән маҗирани тохтитишни қарар қилған. Бу мәмликәтләр билән болған содиниң раванлишип кетиши маһийәттә америкиниң хитайға експорт қиливатқан йеза игилик мәһсулатлири үчүн йеңи базар ечилғанлиққа баравәр болидикән.


Ақ сарай хитайдин импорт қилинидиған 200 милярд америка доллирилиқ таварға 25 пирсәнтлик таможна беҗи қоюш тәклипини оттуриға қойғандин кейин хитай пулиниң курси зор тәсиргә учриған. Ройтерс агентлиқиниң 3-авғусттики хәвиридә ейтилишичә, бу йил апрелдин буян чәтәл базарлирида «хәлқ пули» ниң курси он пирсәнт чүшкән.

Хитай һөкүмити нөвәттә бу әһвалға қарита өч алмақчи икәнликини давраң қиливатқан болуп, хитайға експорт қилиниватқан 60 милярд америка доллири қиммитидики америка маллириға 25 пирсәнт таможна беҗи қойидиғанлиқини җакарлиған. Һалбуки хитайниң америкиға қиливатқан експорти униң америкидин қиливатқан импортидин зор дәриҗидә ешип кәткән икән. Ақ сарайниң ахбарат катипи сара сандерс бу һәқтә тохтилип «өч алимән дегүчә хитай һөкүмити тәңсиз сода мунасивитини оңлашқа зеһин қойса өзигә яхши болар иди» дегән.

Пикирләр (0)
Share
Толуқ бәт