Ақсуниң шаяр наһийәсидә 6.1 Бал йәр тәвригән

Мухбиримиз әркин
2023.01.30

Ақсу вилайитиниң шаяр наһийәси тәвәсидә 30-январ күни әтигән саәт 7 дин 49 минут өткәндә 6.1 Бал йәр тәвригән. Хитай таратқулириниң хәвәр қилишичә, тәврәш мәркизи шаяр наһийә базиридин 141 километир йирақлиқта икән. Хитай йәр тәврәшни өлчәш мәркизи йәр тәврәшни 6.1 Бал, дәп елан қилған болсиму, лекин америка геологийәлик тәкшүрүш мәркизи тәврәш күчиниң 5.7 Бал икәнликини билдүргән. “хитай хәвәрлири тори” ниң бәргән хәвиридә, йәр тәврәш мәркизи шаяр наһийәсиниң адәм шалаң болған районида мәйданға кәлгәнлики, тәврәш мәркизиниң 20 километир даириси ичидә нупусниң интайин шалаң җайлашқанлиқини, нөвәттә йәрлик от өчүрүш вә қутқузуш тармақлириниң сәпәрвәр қилинғанлиқини ейтқан.

Хәвәрләрдә ейтилишичә, йәр тәврәш әтраптики наһийә, шәһәрләрдә күчлүк рәвиштә һес қилинған болсиму, лекин һазирғичә адәм зәхимилиниш вә өлүм-йитим йүз бәргәнликигә даир һечқандақ мәлумат йоқ икән. Хитай һөкүмити районда йүз бәргән иҗтимаий, сиясий вәқәләргә аит учурларни қаттиқ контрол қилипла қалмай, бәлки юқум вә тәбиий апәткә даир учурларниму қаттиқ контрол қилип кәлгән. Шуңа хитайниң райондики һөкүмәт таратқулирида йәр тәврәшниң конкирет тәпсилати, пуқраларниң тәсиргә учраш әһвали, аһалиси шалаң җайлашқан болсиму, лекин йәр тәврәш мәркизи даириси ичидики пуқраларниң тәқдири қатарлиқ мәсилиләр һәққидә һечқандак учур берилмигән.

Чәт әлләрдики ‍уйғур кишилик һоқуқ тәшклилатлириниң қәйт қилишичә, хитайниң 2017-йили башланған чоң тутқунидин кейин районда йүз бәргән тәбиий апәткә даир учурларға еришишму қийинлашқан.

“хитай хәвәрлири тори” ниң хәвиридә, йәр тәврәш мәркизиниң арал шәһиригә техиму йеқин икәнлики, униң арал шәһиригә 105 километир, ақсу шәһиригә 215 километир, үрүмчигә 611 километир келидиғанлиқини билдүргән. Хәвәрдә ейтилишичә, йәр тәврәштин кейин шаяр наһийәлик от өчүрүш әтрити 2 аптомобил билән 10 кишини йәр тәврәш мәркизигә берип тәкшүрүш елип беришқа әвәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.