“Washin'gton pochtisi” géziti: “Baydén bilen shining uchrishishi amérika-xitay munasiwetlirining téximu nacharlishidighanliqini körsetti”

“Washin'gton pochtisi” gézitining obzorchisi josh rogén 16-noyabir maqale élan qilip, 14-noyabir bilen hindonéziyening bali shehiride körüshken amérika prézidénti baydén bilen xitay rehbiri shi jinpingning uchrishishi, amérika-xitay munasiwetlirining yaxshilanmaydighanliqi, belki téximu nacharlishidighanliqini namayen qilghanliqini bildürgen. Josh rogénning éytishiche, ularning uchrishishi, emeliyette ikki derijidin tashqiri chong döletning kelgüsi bir nechche ay we bir nechche yilda téximu köp qarshilishishqa qarap yüzlinishidek epsuslinarliq ré'alliqni körsitip bergen.

Josh rogén “Baydén bilen shining uchrishishi amérika-xitay munasiwetlirining yaxshilanmaydighanliqi, téximu nacharlishidighanliqini körsetti” mawzuliq maqaliside, üch sa'et dawamlashqan söhbette mahiyetlik ilgirlesh bolmighanliqi, chünki amérika-xitay munasiwetlirining qurulma xaraktérlik ikenliki, gerche shi jinping keypiyatni yaxshilashni éytqan bolsimu, biraq uning herikiti bashqa bir ré'alliqni sözlewatqanliqini bildürgen.

 Josh rogénning éytishiche, baydén hökümitining amérika-xitay munasiwetlirini “Saghlam we muqim yolgha sélish” chüshenchisidiki mesile, béyjingning nacharlishiwatqan xaraktéri, shundaqla shi jinpingning herqandaq ixtilapliq mesilini muzakire qilishni xalimaydighanliqini körmeske sélishida ipadilenmekte iken.

U, shi jinping ömürlük diktatur bolghan we hoquqini mustehkemligendin kéyin, xitayning teywen'ge herbiy ighwagerchilik qilishi, Uyghurlargha qaritilghan keng kölemlik qebihlik, adaletsiz soda we bashqa herqandaq bir mesilide mahiyetlik bir ish qilishqa qiziqmaydighanliqini bildürgen. Josh rogénning éytishiche, washin'gton shi jinpingning gumanliq teshebbuslirigha qulaq sélishning ornigha, asiyadiki ittipaqdashlirigha we shériklirige we amérika herbir qomandanlirigha téximu köp qulaq sélishi kérek iken.