Б д т әмәлдариниң хитайниң уйғурлар һәққидики сахта тәшвиқатлириға маслишип, хитайдин 200 миң доллар пул алғанлиқи ашкариланди

Мухбиримиз ирадә
2022-05-19
Share

Бирләшкән дөләтләр тәшкилатиниң иш-паалийәтлирини көзитидиған мустәқил бир орган йеқинда 83 бәтлик бир доклат елан қилип, б д т кишилик һоқуқ кеңиши алаһидә мәлуматчисиниң бейҗиңға қилған бир сәпири мәзгилидә хитайниң уйғурлар һәққидики сахта тәшвиқатлириға янтаяқ болғанлиқи вә хитайдин 200 миң доллар пул алғанлиқини ашкарилиған.

“б д т көзитиш тәшкилати” (UN Watch) доклатида, б д т кишилик һоқуқ кеңишиниң алаһидә мәлуматчиси алена доһанни дәрһал бу пулни хитайға қайтурушқа чақирған.

Мәзкур органниң доклатида көрситилишичә, алена доһан вәзипә өтәватқан мәзгилидә хитайниң уйғурларға йүргүзүватқан ирқий қирғинчилиқини рәт қилидиған тәшвиқат һәрикәтлиригә актип маслашқан вә бу сәвәблик хитайдин 200 миң доллар пул алған.

У, хитай һөкүмити 2021-йили 8-сентәбир күни орунлаштурған “шинҗаң яхши җай” намлиқ тор программисиға қатнашқан. У бу йиғинға хитайниң б д т ниң җәнвәдики баш оргинида турушлуқ баш әлчиси чен шү билән бирликтә қатнашқан болуп, чен шү бу йиғинда “шинҗаңдики һәр милләт кишилири өз қоли вә тиришчанлиқиға тайинип бәхтлик турмуш кәчүрүватиду” дегән. Бу йиғинда йәнә уйғур райониниң рәиси әркин тунияз америка вә башқа ғәрб дөләтлирини “шинҗаңниң һәр милләт кишилирини ишқа орунлаштурушта көрсәткән ғайәт зор тиришчанлиқиға көз юмди” дәп әйиблигән иди.

“б д т көзитиш тәшкилати” доклатида алена доһанни “бу программиға қанишиш арқилиқ хитай һөкүмитиниң милйонлиған уйғурларға қилған зиянкәшликидин ақлинип чиқишиға ярдәм бәрди,” дәп әйиблигән.

Б д т көзитиш тәшкилатиниң иҗраийә мудири һилел неер мундақ дегән:

“хитайниң һазир алена доһан ишләйдиған б д т кишилик һоқуқ ишханисиға тәсир көрситиш үчүн мисли көрүлмигән дәриҗидә пул төләшкә тәйярлиқи муқәррәр. Улар бу шәхсләрниң б д т дики орни арқилиқ өзлириниң мустәбит вә рәһимсиз һакимийәтлириниң кишилик һоқуқ дәпсәндичиликлирини ақлашқа урунмақчи.”

Һилел неер йәнә мундақ дегән: “б д т ниң барлиқ кишилик һоқуқ әлчилиригә охшаш, алена доһанниң мустәқиллиқ, сәмимийәт, тәрәпсизлик принсиплирини қоғдаш мәҗбурийити бар. У хитай һакимийитидин 200 миң доллар елип, б д т ниң әң асасий әхлақ принсипиға хилаплиқ қилди. Биз алена доһанни пулни дәрһал қайтурушқа, б д т кишилик һоқуқ мутәхәссисиниң хитай һакимийитиниң уйғурларға қаритилған җинайи қилмишлирини ақлишиға актип ярдәм қиливатқанлиқи тоғрисидики гуманларни йоқитишқа чақиримиз”.

Һилел неер сөзидә йәнә б д т баш катипи антонийо гутеррес, кишилик һоқуқ алий комиссари мишел бачелет вә американиң б д т дики баш әлчиси линда томас-гиринфелдқа чақириқ қилип, алена доһанни җавабкарлиққа тартишни тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт