Bir neper Uyghur changgha téyilish mahiri béyjing qishliq olimpik musabiqisige qatnishidiken

Muxbirimiz irade
2022-01-27
Share

Uyghurlargha qarita irqiy qirghinchiliq we insaniyetke qarshi jinayet bilen eyibliniwatqan xitay hakimiyitining sahibxanliqidiki 2022-yilliq béyjing qishliq olimpik musabiqisige qatnishidighan xitay tenterbiyichiler arisida bir neper Uyghur mahirning barliqi melum.

Xitayning “Yer shari waqti géziti” ning tarqatqan xewirige qarighanda, bu Uyghur tenterbiye mahirining ismi dilnigar ilhamjan bolup, bu yil 20 yashta iken. U 2017-yili xitay döletlik komandisigha tallan'ghandin kéyin, üch yil norwégiyede telim alghanliqi melum. Dilnigar ilhamjan béyjing qishliq olimpik musabiqisida dalada changgha téyilish türi boyiche musabiqige qatnishidighan bolup, u 11-ayda ötküzülgen bir xelq'araliq musabiqide chimpiyonluqqa érishken iken.

Xewerde éytilishiche, dilnigarning dadisi ilhamjanmu 1980-yillardiki changgha téyilish mahiri bolup, 1993-yili xitay boyiche ötküzülgen qar téyilish musabiqisde 3-bolghan iken.

Roytérs agéntliqining xewer qilishiche, béyjing qishliq olimpik musabiqisige xitaygha wakaliten qatnishidighan mahirlarning 5 nepiri Uyghur élidin tallan'ghan iken. Dilnigardin bashqa yene ikki neper qazaq, bir neper qirghiz we bir neper xitay mahiri bar iken. Roytérs agéntliqining xewiride bu qétimliq qishliq olimpikke qatnishidighan tenheriketchiler ichide yene ikki neper tibet mahiriningmu barliqi qeyt qilin'ghan.

Xelq'aradiki kishilik hoquq terepdarliri xelq'araliq olimpik komitétini, olimpik musabiqisini xitaygha oxshash irqiy qirghinchiliq bilen shughulliniwatqan bir hakimiyetke bérish arqiliq musabiqige qatnishidighan döletler hem tenterbiyechilerni zulumgha shérik bolushqa mejburlidi, dep eyiblep kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet