Байден билән ши җинпиң телефонда сөзлишип “тоқунушниң алдини елиш” ни музакирә қилған

Мухбиримиз әркин
2021.09.10
Share on WhatsApp
Share on WhatsApp

Америка президенти җов байден билән хитай рәиси ши җинпиң 9-сентәбир күни телефонда сөзлишип, “икки дөләт арисидики риқабәтниң тоқунушқа айлинип кәткмәсликигә капаләтлик қилиш” ни музакирә қилған. Бу телефон сөһбити америка-хитай мунасивити сода, җасуслуқ, корона вируси юқуми, уйғур ‍ирқий қирғинчилиқи, хоңкоң, тәйвән вә җәнубий деңиз мәсилилири сәвәблик өткүрлишип кәткән, хитай америкадин “хитайни тәһдит” дәп қараштин ваз кечиш, хитай әмәлдарлириға йүргүзгән имбаргони бикар қилиш қатарлиқларни тәләп қиливатқан бир вақитта елип берилған.

Бу президент байденниң вәзипигә олтурғандин бери ши җинпиң билән 2-қетим телефонда сөзлишиши болуп, у өткән қетим сөзләшкәндә уйғурлар мәсилисини оттуриға қойған иди. Ақсарайниң баянатида ейтишиличә, бу телефон сөһбити “америка тәрәпниң америка билән хитай хәлқ җумһурийити оттурисидики риқабәтни мәсулийәтчанлиқ билән идарә қилиш тиришчанлиқиниң бир парчиси,” икән.

Баянатта президент байдинниң “американиң һинди-тинч окян райони, дуняниң тинчлиқи, муқимлиқи вә гүллинишигә болған узун мәзгиллик мәнпәәтини алаһидә тәкитлигәнлики вә икки дөләт рәһбириниң риқабәтниң тоқунушқа айлинип қалмаслиқиға капаләтлик қилиш үчүн һәр икки дөләтниң мәсулийитини музакирә қилғанлиқи” тәкитләнгән.

Хитай таратқулириниң ейтишичә, сөһбәттә ши җинпиң американиң бир мәзгил хитайға қаратқан сиясити америка-хитай мунасивәтлирини қийинчилиққа дучар қилғанлиқи, бейҗиң билән вашингтонниң келимат мәсилиси, юқумниң алдини елиш вә контрол қилиш, иқтисадни әслигә кәлтүрүш қатарлиқ сәһәләрдә һәмкарлишиши керәклики, бирақ бу хил һәмкарлиқ “бир-бириниң ядролуқ әндишилиригә һөрмәт қилиш, ‍хтилапларни мувапиқ бир тәрәп қилиш” ни асас қилиши керәкликини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.