Чен чүәнго қәшқәр зияритидә «иҗтимаий муқимлиқ» вә «намратлиқини түгитиш» ни тәкитлигән

Мухбиримиз ирадә
2020-04-23
Елхәт
Пикир
Share
Принт

Уйғур районида таҗсиман вирус юқуми қамали бикар қилинғандин кейинла һәр дәриҗилик хитай рәһбәрлириниң арқа-арқидин җәнубий уйғур дияриға, болупму қәшқәргә зиярәткә бериши диққәт қозғимақта.

«Тәңритағ» ториниң хәвиригә қариғанда, йеқинда уйғур аптоном районлуқ парткомниң секретари чен чүәнго «юқумниң алдини елиш, иқтисадий вә иҗтимаий тәрәққиятни илгири сүрүш» намида қәшқәргә берип хизмәт тәкшүрүшидә болған.

У зияритидә «хитай рәиси ши җинпиңниң йолйоруқлирини, җәмийәт муқимлиқи вә узун муддәтлик әминликтин ибарәт омумий нишанға йетиш билән биргә намратлиқтин қутулуш нишаниға капаләтлик қилиш» ни тәкитлигән.

Хитай һөкүмәт таратқулири техи бир қанчә күн илгири, йәни 18-20-апрел күнлири хитай компартийиси сиясий бюросиниң әзаси, хитайниң муавин баш министири, хитай дөләт кабинети «намратларни йөләш-ронақ тапқузуш рәһбәрлик гурупписи» ниң башлиқи ху чүнхуаниң уйғур елиниң җәнубида хизмәт зияритидә болғанлиқини вә униң уйғур районидики намратлиқтин қутулдуруш хизмитигә, болупму җәнубий уйғур елидә намратлиқтин қутулуш җеңидә ғәлибә қилишни нуқтилиқ һалда тәкитлигәнликини баян қилған иди.

Чәтәлләрдики көзәткүчиләрниң қаришичә, юқириқи икки нәпәр хитай әмәлдарниң арқиму-арқидин қәшқәрни зиярәт қилиши хитай һөкүмитиниң бундин кейин уйғур дияриниң җәнубиға йүзлинишни асасий нишан қиливатқанлиқини көрситип беридикән. Бу нуқтидин қариғанда, хитай даирилириниң бундин кейин уйғур дияриниң җәнубини ечишни тезлитип, йәниму көп хитай ширкәтлири вә хитай көчмәнләрни җәнубқа орунлишишқа тәшәббус қилидиғанлиқи мөлчәрләнмәктә.

Пикирләр (0)
Share
Толуқ бәт