“шиңдав” гезитиниң америка ишханиси “чәт әл вакаләтчиси” қилип бекитилгән

Мухбиримиз ирадә
2021-08-26
Share

Америка хитайниң “шиңдав” намлиқ гезитиниң америкадики ишханисини “чәт әл вакаләтчиси” дәп бекиткән.

“аксийос” гезитиниң хәвәрлиригә қариғанда, америка адаләт министирлиқи бу һәптә “чәт әл вакаләтчилирини тизимлаш қануни” ға асасән “шиңдав” гезитиниң америкадики паалийәтлирини “чәт дөләтләрниң тәсир көрситиш һәрикити” дәп баһалиған икән.

“шиңдав” гезити буни инкар қилип, гезитниң хусусийлар игилидики мустәқил ахбарат икәнликини, униң хитай компартийәсиниң контроллуқи вә тәсиригә учримайдиғанлиқини илгири сүргән.

“шиңдав” гезити хоңкоңда хитай тилида нәшир қилинидиған әң кона гезитләрниң бири болуп, бу гезитниң көп қисим пайчекини бу йил 6-айда хитайдики бир өй-мүлүк ширкити хоҗайининиң қизи сетивалған икән. “шиңдав” гезитиниң ню-йорк, лос-анжелес вә сан-фирансискода мәхсус ишханилири вә калифорнийәниң бурлингамға җайлашқан радийо истансиси бар икән.

Америка һөкүмитиниң байқишичә, “шиңдав” гезитиниң америкада тарқитилидиған гезит вә радийолиридики мәзмунларниң йеримидин көпрәки хитайниң “юлтуз мәһсулатлири” (Star Production) чәклик ширкитидин сетивелинған мәзмунлар икән.

Америка һөкүмити бундин илгири хитайниң шинхуа агентлиқи, хитай йәр шари телевизийиси тори қатарлиқ 5 ахбарат оргинини “чәт әл вакаләтханиси” дәп бекиткән иди. Арқидин йәнә хитай мәркизи телевизийиси, хитай хәвәр агентлиқи, “хәлқ гезити” вә “йәр шари вақит гезити” қатарлиқ 4 органниму “чәт әл вакаләтханиси” қилип бекиткән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт