Xitay térmo féshirning DNA retlesh eswabini tibetlerni basturushtimu ishletken

Washin'gtondin muxbirimiz erkin teyyarlidi
2024.01.03

Xitay hökümiti 2017-yili bashlan'ghan chong tutqunda Uyghurlarning DNA uchurlirini toplap, DNA sanliq melumat ambiri qurushta amérikadiki térmo féshir shirkitining DNA retlesh eswabini qollan'ghan.

Eyni waqitta bu weqe amérika dölet mejlisi ezalirining qattiq naraziliqini qozghighanidi؛ netijide bu heqte so'al-soraqqa duch kelgen térmo féshir shirkiti, Uyghur rayonigha DNA retlesh eswabi sétishni toxtatqanliqini élan qilghanidi. Nöwette xitayning térmo féshir shirkitining DNA retlesh eswabini tibetlerning DNA uchurlirini toplashtimu ishletkenliki melum bolghan. Amérikadiki “Oksiyus” torining xewer qilishiche, nöwette térmo féshir shirkiti kishilik hoquq teshkilatliri we amérika dölet mejlisining bésimida tibetkimu DNA retlesh eswabi sétishni toxtatqanliqini bildürgen.

“Oksiyus” ning 3-yanwar bergen xewiridin melum bolushiche, térmo féshir shirkitining bayanatchisi “Oksiyus” torigha yazma bayanat ewetip, “Biz bir qatar amillargha asasen 2023-yilining otturiliridin bashlap bu rayon'gha insan kimlikini perqlendürüsh téxnikisi (HID) mehsulatlirini sétishni toxtattuq. Tibet aptonom rayonigha bizning insan kimlikini perqlendürüsh téxnikimizni satmasliqni qarar qilduq” dégen.

2022-Yili, xitay saqchi organlirining tibette térmo féshirdin sétiwalghan DNA retlesh eswablirini ishlitip, tibetlerning DNA uchurlirini toplighanliqi ashkarilan'ghanidi. 2022-Yilning axirlirida, amérika dölet mejlisi xitay ishliri ijra'iye komitéti térmo féshirning mes'uli mark kaspérgha xet yézip, bu shirketning DNA retlesh eswablirini tibettiki xitay saqchi da'irilirige satqanliqidin qattiq endishe qilghanliqini, bu eswablarning qandaq ishlargha ishlitiliwatqanliqini tekshürüshni telep qilghan.

Xitay da'irilirining 2017-yili Uyghurlargha qaratqan chong tutquni bashlinishtin burun, omumi xelq salametlik tekshürüshi namida toplighan DNA uchurlirini retleshte térmo féshir shirkitidin sétiwalghan DNA retlesh eswabidin paydilan'ghanliqi, bu arqiliq Uyghurlarning DNA uchur ambirini qurup chiqip, 2017-yili bashlan'ghan chong tutqunda buningdin paydilan'ghanliqi melum bolghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.