ئەنگلىيە تاشقى ئىشلار مىنىستىرى خىتاينى خەلقئارا قائىدىلەرگە ئۇيغۇن ھەرىكەت قىلىش ھەققىدە ئاگاھلاندۇرغان

مۇخبىرىمىز ئىرادە
2022-04-28
Share

ئەنگلىيە تاشقى ئىشلار مىنىستىرى لىز ترۇس( Liz Truss ) 27-ئاپرېل كۈنى لوندوندا قىلغان سۆزىدە خىتاينى خەلقئارا قائىدىلەرگە ئۇيغۇن ھەرىكەت قىلىش ھەققىدە ئاگاھلاندۇرغان. ئۇ خىتاينىڭ ئەكسىچە ھەرىكىتىنىڭ ئۇنىڭ دەرىجىدىن تاشقىرى دۆلەت بولۇشتەك ئارزۇسىنى سۇغا چىلاشتۇرىدىغانلىقىنى بىلدۈرگەن.

ترۇس مۇنداق دېگەن: «دۆلەتلەر چوقۇم قائىدە بويىچە ھەرىكەت قىلىشى كېرەك. بۇ خىتاينىمۇ ئۆز ئىچىگە ئالىدۇ. ئەگەر ئۇلار قائىدىگە ئەمەل قىلمىسا، ئۇلار داۋاملىق ئۆرلىيەلمەيدۇ. چۈنكى خىتاي G-7 دۆلەتلىرى بىلەن سودا قىلىشقا موھتاج. بۇ يەتتە دۆلەت دۇنيا ئىقتىسادىنىڭ يېرىمىغا ۋەكىللىك قىلىمىز. شۇڭا بىزنىڭ تاللاش ھوقۇقىمىز بار».

ئۇ بۇنىڭغا رۇسىيەنىڭ ئۇكرائىناغا تاجاۋۇزچىلىقى تۈپەيلىدىن دۇنيا ئىقتىسادىدىن ئايرىۋېتىلگەنلىكىنى مىسال قىلىپ كۆرسىتىپ: «بىز رۇسىيە مىسالى ئارقىلىق خەلقئارالىق قائىدىگە خىلاپلىق قىلىنغاندا قانداق ھەرىكەت قىلىدىغانلىقىمىزنى دۇنياغا كۆرسەتتۇق» دېگەن ۋە ئەمدى غەربنىڭ بازىرىنىڭ ئاسانلىقچە ئوچۇق بولمايدىغانلىقىنى تەكىتلىگەن.

ئەنگلىيە تاشقى ئىشلار مىنىستىرى ترۇس سۆزىدە يەنە ھىندى-تىنچ ئوكياننىڭ بىخەتەرلىكى مەسىلىسىنىمۇ تىلغا ئېلىپ «بىز ھىندى-تىنچ ئوكياندىكى تەھدىتلەرنى ئالدىن ئويلىشىشىمىز كېرەك، ياپونىيە ۋە ئاۋسترالىيە قاتارلىق ئىتتىپاقداشلار بىلەن ھەمكارلىشىپ، تىنچ ئوكياننىڭ قوغدىلىشىغا كاپالەتلىك قىلىشىمىز كېرەك» دېگەن.

ئۇ يەنە مۇنداق دېگەن: «بىز چوقۇم تەيۋەنگە ئوخشاش دېموكراتىك تۈزۈملەرنىڭ ئۆزىنى قوغدىشىغا كاپالەتلىك قىلىشىمىز كېرەك».

تەيۋەن تاشقى ئىشلار مىنىستىرلىقى بولسا 28-ئاپرېل كۈنى ترۇس خانىمنىڭ بۇ سۆزلىرىنى قارشى ئېلىپ ئىنكاس قايتۇرغان ھەمدە ئەنگلىيە ۋە باشقا ئوخشاش پىكىردىكى شېرىكلەر بىلەن بولغان ھەمكارلىقنى داۋاملىق چوڭقۇرلاشتۇرۇپ، تەيۋەن بوغۇزىنىڭ تىنچلىقى ۋە مۇقىملىقىغا كاپالەتلىك قىلىدىغانلىقىنى ئېيتقان.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت