Әркин туняз: “ши җинпиңниң йолйоруқлирини давамлиқ вә қәтий тәврәнмәй иҗра қилимиз”

Вашингтондин мухбиримиз уйғар тәйярлиди
2024.05.22

“шинҗаң гезити” ниң 2024-йили 5-айниң 21-күндики хәвиригә асасланғанда хитай дөләт ишлири кабинети учур ишханиси бейҗиңда “юқири сүпәтлик тәрәққиятни илгири сүрүш” темисида бир йүрүш ахбарат елан қилиш йиғини ачқан. Мәзкур йиғинда уйғур аптоном райониниң рәиси әркин тунияз уйғур аптоном районниң “аләмшумул тәрәққият” ти вә кәлгүси пилани тоғрулуқ доклат бәргән вә мухбирларниң соаллириға җаваб бәргән.

Әркин туняз уйғур райониниң омумий иҗтимаий вәзийитиниң давамлиқ муқим икәнликини вә җуңхуа миллити еңиниң кишиләрниң қәлбидә чоңқур йилтиз тартқанлиқини алаһидә тилға елип мундақ дегән: “ши җинпиңниң йолйоруқлирини давамлиқ вә қәтий тәврәнмәй иҗра қилимиз, партийәниң йеңи дәврдики шинҗаңни башқуруш истратегийәсини толуқ, тоғра вә әтраплиқ йолға қоюп, муқимлиқни техиму илгири сүримиз. Миллий иттипақлиқни вә вәтәнниң бирликини қәтий қоғдап, шинҗаңни енергийә вә ашлиқ базиси қилип қуруп чиқимиз” .

 Әркин тунязниң “уйғур районниң муқимлиқи вә узун мәзгиллик әминликигә капаләтлик қилишни вә ши җинпиңниң йолйоруқлирини давамлиқ вә қәтий тәврәнмәй иҗра қилиш” ни тәкитлиши, уйғур дияридики сиясий контроллуқниң бундин кейинму давам қилидиғанлиқи, бәлки техиму қаттиқ вә җиддий түрдә иҗра қилинидиғанлиқиниң бешарити дәп қаралмақта.

 Хитай компартийәси мәркизий комитети сиясий биюроси даимий комитетиниң әзаси, баш министир ли чяң 5-айниң 7-күнидин 9-күнигичә үрүмчи шәһири, санҗи туңган аптоном области, ишләпчиқириш қурулуши армийәси 6-дивизийәсиниң вуҗячү шәһиригә берип тәкшүрүп илип барғаниди. Уму зияритидә район бихәтәрликиниң хитай дөләт бихәтәрлики вә иқтисадий тәрәққиятидики орниниң муһимлиқини көрситип районниң муқимлиқи вә узун мәзгиллик әминликигә капаләтлик қилиш керәкликини алаһидә тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.