Mayk galagér: “BGI Xitay armiyesi bilen birliship Uyghurlar génining késelge qarshi iqtidarini tetqiq qilghan”

Washin'gtondin muxbirimiz erkin teyyarlidi
2024.03.08

Amérika awam palata ezasi, awam palatasining xitay istiratégiyelik riqabet alahide komitétining re'isi mayk gallagér bu komitétning 7-mart küni ötküzülgen bir qétimliq guwahliq yighinida, xitaydiki eng chong gén tetqiqat orunlirining biri bolghan béyjing gén inistituti (BGI)ning xitay armiyesi bilen birliship, Uyghurlar génining késelge taqabil turushtiki immunt iqtidari üstidin birleshme tetqiqat élip barghanliqini bildürgen.

Béyjing gén tetqiqat instituti ilgiri xitay hökümitining Uyghur gén ambiri qurup, Uyghurlarni basturushta ularning DNA uchurliridin paydilinishigha yardem bérish bilen eyiblinip kelgen. Ilgiri yene xitay armiyesi tébbiy tetqiqat orunlirining Uyghur ayallirining gén alahidiliklirini tetqiq qilghanliqigha a'it xewerler bérilgen idi.

Melum bolushiche, mayk gallagér amérika awam palatasi xitay istiratégiyelik riqabet alahide komitétining 7-mart ötküzülgen “Bi'o-iqtisad we amérika dölet xewpsizliki” namliq guwahliq yighinida yuqiriqi agahlandurushni bergen.

Mayk gallagér mundaq dégen: “Béyjing gén instituti xitay kompartiyesining DNA ambiri qurushigha yardem bergen. Shundaqla bu shirket (xitay) xelq azadliq armiyesi bilen birlikte Uyghur musulmanlirining késelge taqabil turush gén alahidilikini bilish üchün birleshme tetqiqat élip barghan.”

Mayk gallagérning éytishiche, amérika dölet mudapiye ministirliqi béyjing gén institutini “Herbiy karxana” dep békitken, shundaqla amérika soda ministirliqi bu shirketning depsendichilik xaraktérlik DNA ewrishkilirini toplishi we buni shinjangdiki ahalilerni basturushta qollinishqa yardem bérishi sewebidin ‍émbargo qoyghan iken.

Xitay hökümitining 2016-yili Uyghur diyarida élip barghan keng kölemlik mejburi omumiy xelq salametlik tekshürüsh herikitining kéyinrek Uyghurlarning DNA ambirini qurush meqsitide élip bérilghanliqi melum bolghan. Halbuki, mayk gallgér guwahliq yighinida qilghan sözide béyjing gén institutining xitay armiyesi bilen qandaq meqsette bu tetqiqatni élip barghanliqi we bu tetqiqatning qandaq netije bilen axirlashqanliqigha chüshenche bermigen. Amérika bi'o-téxnologiye bixeterlik sahesidiki mutexessislerning guwahliq yighinida qeyt qilishiche, nöwette xitay amérikaning bi'o-téxnologiye sahesidiki ‍üstünlükige jiddiy xiris peyda qilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.