Roytérs agéntliqi: "Xitayning musulman gulaglirining izigha chüshüsh" namliq doklat élan qildi

Muxbirimiz erkin
2018-11-30
Share

Rotérs agéntliqi amérikidiki "Érsrays" (Earthrise) namliq bir sün'iy hemrah resimlirini analiz qilish orgini bilen xitayning Uyghur rayonida qurghan 39 orundiki yighiwélish lagérining qurulushi we kéngeytilish ehwalini analiz qilip, uzun hejimlik bir axbarat doklati élan qilghan.

Axbarat doklatida bayan qilinishiche, ular bu lagérlardiki binalarni birmu-bir analiz qilish arqiliq bu lagérlarning qurulghan deslepki mezgildiki kölimi 2017‏-yili 4‏-aydin 2018‏-yili 8‏-ayghiche bolghan 17 ay ichide 3 hesse kéngeygen. Axbarat doklatida, ular analiz élip barghan bu 39 lagérning hazirqi omumiy kölimining 140 putbol meydanigha teng kélidighanliqi bildürülgen.

Roytérs agéntliqi xitayning Uyghur rayonidiki yighiwélish lagérlirining sün'iy hemrah resimlirini analiz qilip, uning kölimi we uningdiki tutqunlarning sani heqqide chong hejimlik axbarat doklati élan qilghan 2‏-xelq'ara axbarat organidur. Buningdin burun en'gliye BBC agéntliqi lagérlarning sün'iy hemrah resimlirini we neq meydan körünüshlirini analiz qilip chong hejimlik axbarat doklatida élan qilghan idi.

BBC Ning doklatida xitayning ürümchi etrapigha jaylashqan dawanchingdiki yighiwélish lagérigha 130 ming adem sighidighanliqi bildürülgen idi. Roytérsning axbarat doklatida qeyt qilinishiche, ular Uyghur rayonidiki yighiwélish lagéri, dep qaralghan 7 orun'gha özining muxbirlirigha ewetken. Muxbirlar bu orunlargha yéqinlishishqa urun'ghan bolsimu, biraq bu orunlarni qoghlawatqan saqchilar buninggha yol qoymighan.

Roytérsning ilgiri sürüshiche, ular analiz élip barghan 39 orundiki 39 yighiwélish lagérining ichidiki kölimi eng chong yighiwélish lagéri korla shehiride iken. Axbarat doklatida, korlidiki mezkur yighiwélish lagérining yéqinqi 17 ay ichide 2 hesse kéngeygenliki, uning bu yil 8‏-ayda tartilghan sü'iy hemrah resimidiki omumiy qurulush kölimining 140 ming kwadrat métirgha yétip barghanliqi ilgiri sürülgen.

Axbarat doklatida yene mezkur rayonning bu weziyiti yéqindin buyan amérika we b d t ning diqqitini qozghashqa bashlighanliqi, bezi amérika dölet mejlisi ezalirining chén chü'en'go bashchiliqidiki bezi xitay emeldarlirini jawabkarliqqa tartishni telep qilghanliqi alahide tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet