Җеймис вилсон: «хитайниң һакиммутләқлиқ арқилиқ башқиларни контрол қилиши ‹1984' ниң нәқ өзи!»

Мухбиримиз әзиз
2019-06-13
Елхәт
Пикир
Share
Принт

Уйғурлар дуч келиватқан иҗтимаий киризисниң дуняви темилардин болушиға әгишип бу әһваллар һәққидә мулаһизә йүргүзидиған обзорчилар барғансери көпәймәктә. явропа иттипақи қармиқидики сода консулиниң директори җеймис вилсон әнә шу хил кишиләрниң бири.

Униң 11-июн күни «бирюссел тез почтиси» да елан қилинған бу һәқтики мақалисидә у өзиниң яш вақитлирида җорҗи орвелниң «1984» намлиқ романини иштияқ билән оқуп чиққанлиқи, әмма романда тәсвирләнгән әһвални өзиниң «реал дуняда һечқачан йүз бәрмәйдиған вәқә» дәп қарап кәлгәнлики, һалбуки нөвәттә хитай компартийәсиниң уйғурларға қаратқан бастурушлириниң бу романдикидин нәччә һәссә ешип чүшкәнлики баян қилиниду.

Җеймис вилсонниң қаришичә, романниң аптори мушундақ бир иҗтимаий муһитниң барлиққа келишини пәрәз қилған һәмдә буни 1984-йили мәйданға келиду, дәп қариған болуши мумкин икән. Әмма мақалә аптори бу һалниң 2016-йилидин башлап уйғурлар диярида барлиққа кәлгәнликини, шуниңдәк җорҗи орвелму тәсәввур қилмиған юқири пән-техника амиллириниң бу һалға тәдбиқланғанлиқини алаһидә тәкитләйду. Шуниң билән биргә бирюссел университетиниң профессори ванесса ферангвеллиниң уйғурлар дияридики лагерларни тәкшүрүш, хитай һөкүмитиниң бу хил бастурушлириға «шерик» болуп қалған чәтәл карханилирини агаһландуруш чақириқлириға өзиниңму аваз қошидиғанлиқини билдүргән.

Апторниң қаришичә, һазир хоңкоңда давам қиливатқан милйон кишилик намайишму дәл мушу хил һакиммутләқлиқ арқилиқ башқиларни контрол қилишқа қарши оттуриға чиққан хәлқ һәрикити икән.

Пикирләр (0)
Share
Толуқ бәт