Hilariy klinton démokratlar partiyesidin prézidént namzatliqigha körsitildi

Muxbirimiz jüme
2016-07-27
Élxet
Pikir
Share
Print

Hilariy klinton xanim démokratlar partiyisi teripidin bu nöwetlik amérika prézidéntliq namzatigha körsitilip, amérika tarixida prézidént namzatliqigha körsitilgen tunji ayal bolup qaldi.

Hilariy klinton sabiq amérika prézidénti bil klintonning xanimi bolup, u 2009-yilidin 2013-yilighiche amérika dölet ishlar ministiriliq wezipisini atqurghan.

U seyshenbe küni kech filadélfiye shehiride chaqirilghan 2016-yilliq démokratlar partiyisining memliketlik wekiller qurultiyida namzatliqqa körsitilgen idi.

U, murasimda öz partiyesining namzatliqini qobul qilidighanliqini jakarlap mundaq dédi: "Eger hazir uxlimay bu pa'aliyetni körüwatqan kichik qizlar bolsa, men shuni éytay: belkim men tunji ayal prézidént bolup qélishim mumkin, emma aranglardiki biringlar choqum kelgüsidiki [ayal] prézidént bolisiler."

Sabiq prézidént klinton ependi repiqisi hilariy xanimgha yuqiri baha berdi we uning amérika nöwette yoluquwatqan xeterlerni peseyteleydighan birdin ‏-bir namzat ikenlikini bildürdi.

Bu nöwetlik amérika prézidéntliq saylimi dunya miqyasida, jümlidin amérikida térrorluq hujumliri bir qeder köp körüligen mezgilge toghra keldi.
Amérikida ötken 8 ay ichidila ikki qétim térrorluq hujumi yüz bergen. Bularning biri ötken yili 2-dékabir kalforniyening san bénardino shehiride, yene bir bu yil 13-iyun florida shtatining orlando shehiride yüz bergen térrorluq hujumliri. Bu hujumlarda az dégende 63 adem hayatidin ayrilghan, 70 tin artuq adem yarilan'ghan idi.

Hilariy klinton bu yul 8-noyabir ötküzülidighan amérika prézidéntliq saylimida jumhuriyetchiler partiyisidin namzatliqqa körsitilgen donald tramp bilen riqabetke chüshidu.

Eger u bu nöwetlik saylamda utup chiqalisa, amérika tarixida saylan'ghan tunji ayal prézidént bolup qalidu.

Toluq bet