Хоңкоңда мәдәнийәт инқилаби һәққидә муһакимә йиғини ечилди

Мухбиримиз үмидвар
2017.01.08
Share on WhatsApp
Share on WhatsApp


Хитай һөкүмити тунҗи қетим мәдәнийәт инқилаби һәққидә муһакимә йиғини ечишни рухсәт қилған болуп, мәзкур муһакимә йиғинини хоңкоң хитай әдәбияти университетиниң хитай тәтқиқат хизмәт мәркизи билән һазирқи заман хитай мәдәнийити тәтқиқат мәркизи бирлишип тәшкиллигән.

Мәдәнийәт инқилабиниң 50 йиллиқиға беғишланған мәзкур илмий муһакимә йиғиниға хитай вә чәтәлләрниң мәхсус мәдәнийәт инқилаби мәсилилири үстидә тәтқиқат қиливатқан мутәххәсилири қатнишип, 160 тин артуқ киши муһакимини аңлиған.

Йиғинда йәнә хитай иҗтимаий пәнләр академийисиниң мутәхәсислириму доклат бәргән.

Америка авазиниң бу һәқтики хәвридә илгири сүрилишичә, йеқинқи вақитларда хитайда мәдәнийәт инқилаби мәсилилири һәққидә ашкара йосунда муһакимә паалийәтлири өткүзүш асасий җәһәттин чәклимигә учриған болуп, һәтта бир қанчә мәдәнийәт инқилаби дәври һәққидә тәтқиқат қиливатқан хитай мутәхәссиси чәтәлдә өткүзүлгән бу һәқтики илмий муһакимә йиғинға қатнишиш сәпиридин тохтитип қоюлуш вәқәлириму садир болған икән. Бу қетим, чоң қуруқлуқниң идариси астидики хоңкоңда мәдәнийәт инқилаби һәққидә мәхсус муһакимә йиғин ечишқа рухсәт қилиш бир тунҗи иш болуп һесаблинидикән.

Мутәхәссисләрниң қаришичә, мәдәнийәт инқилабиниң кәлтүргән зиянлири вә хатаси хитайда илгири көп тәкитләнгән болсиму, әмма инқилабни қозғиған хитай компартийә рәһбәрлири мав зедоң, җу енләй вә башқиларға қайта баһа бериш һәм уларниң мәдәнийәт инқилабиниң арқа көрүнишидики вә зиянлиридики роли, орни вә башқа көплигән мәсилиләрдә әркин пикир йүргүзүшкә изчил чәк қоюлуп келингән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.