Ички моңғул баяннур яйлиқидики наразилиқ билдүргән моңғуллар тутқун қилинди

Мухбиримиз меһрибан
2016-05-17
Елхәт
Пикир
Share
Принт

Хитайниң сина торида елан қилинған рәсимлик хәвәрдә 17-май күни ички моңғулниң баяннур шәһири оттура урат хошути (наһийиси)да һөкүмәт бинаси алдиға йиғилип, наһийидики алюмин завутини тақашни тәләп қилған моңғул чарвичиларниң тутқун қилинғанлиқи мәлум болди.

Мәзкур хәвәр сина торидики мәлум блог саһиби тәрипидин хитай вақти сәйшәнбә күни кәчтә йолланған. Хәвәрдә баяннур шәһири оттура урат хошут һөкүмәт даирилириниң сәйшәнбә күни әтигән бир түркүм алаһидә сақчиларни әвәтип, һөкүмәт бинаси алдиға наразилиқини билдүрүшкә кәлгән моңғулларни тутқун қилинғанлиқи тилға елинған. Әмма конкрет қанчилик адәмниң тутқун қилинғанлиқи һәққидики тәпсилат берилмигән һәм хитай һөкүмәт тәрәптинму бу һәқтә бирәр рәсмий учур елан қилинмиған.

Ички моңғулниң баяннур шәһиригә қарашлиқ оттура урат хошутида 5-айниң 9-күни вә 13-күнлири моңғул чарвичиларниң наразилиқ намайиши йүз бәргән болуп, мәлум болушичә, 17-май күни тутқун қилинған моңғуллар әйни чағдики наразилиқ һәрикитигә қатнашқанлар икән.

10-Май күни радийомизға әһвални билдүргән моңғул чарвичилар хитайниң мәзкур наһийидә қурған алюмин завутидин чиққан керәксиз маддилардин зәһәрлинип өлгән чарвилири үчүн һөкүмәттин төләм бериш вә наһийидики алюмин завутини тақаш тәлипини билдүргән 300 дәк моңғул чарвичиниң хошутлуқ һөкүмәт алдиға йиғилип наразилиқ намайиши қилғанлиқини билдүргән иди.

Пикирләр (0)
Share
Толуқ бәт