Uyghur élide kéchilik tekshürüsh kücheytilip, téléfonlar kontrol qilindi

23 - Aprél maralbéshi weqesidin kéyin, da'iriler Uyghur élide her xil bixeterlik tedbirliri alghandin bashqa öy we qol téléfonlirigha qaritilghan kontrolluqni kücheytti. Téléfonlargha bolghan kontrolluq heqqide resmiy uqturushmu chiqirilghan.

Melum bolushiche, Uyghur élining xoten, qeshqer,aqsu, ghulja qatarliq jayliridiki Uyghurlar topliship olturaqlashqan mehellilerde kéchilik tekshürüsh we natonush kishilerning kimlikini tekshürüsh kücheytilgen.

Radi'omiz igiligen uchurlardin melum bolushiche, birnechche kündin buyan maralbéshi we jenubiy Uyghur élidiki öy téléfonlirigha chet'eldin urulidighan téléfonlar kontrol qilin'ghan. Undin bashqa ahalilar namelum téléfonlargha jawab bermeslikke agahlandurulghan. Da'iriler ürümchide 27 - aprél küni uqturush chiqirip,3 - maydin ilgiri ürümchi tömüryol idarisi qatarliq jaylardiki nimkesh téléfon bazarlirining taqilidighanliqini élan qilghan.

“Uyghurbiz” toridimu jenubiy Uyghur élidiki idare - organlarda közetchi xadimlar köpeytilip,ahaliler rayonigha natonush kishilerning kirishi cheklen'genliki xewer qilindi. “Uyghurbiz” torining 28 - apréldiki sanida,xoten pen - téxnika idarisining ahaliler rayonigha kéchisi sa'et 9 din kéyin kirish - chiqish cheklen'genliki, aqsu da'irilirining kéche sa'et 11 din kéyin barliq tijaretchilerning dukanlirini taqashni uqturup, idare - organlardiki küzetchilerni köpeytkenliki xewer qilindi.