Хәлқара кәчүрүм тәшкилати хитай өктичиниң аилә әзалириниң тутқун қилинғанлиқини тәнқид қилди

Хәлқара кәчүрүм тәшкилати җүмә күни баянат елан қилип, хитай рәиси ши җинпиңни истепаға чақирған хитай өктичи вен йүнчавниң аилә әзалириниң тутқун қилинғанлиқини тәнқид қилди.

Һазир ню-йорк шәһиридә турушлуқ вен йүнчавниң фирансийә агентлиқиға билдүрүшичә, хитай даирилири һечқандақ чүшәнчә бәрмәй, униң гуаңдуңдики аилә әзалиридин 3 кишини тутуп кәткән.

Даириләр вен йүнчавни бу йил 4‏-март хоңкоңдики мәлум тор бетидә “садиқ компартийә әзалириниң очуқ хети” ни елан қилип, хитай рәиси ши җинпиңни истепаға чақириш вәқәсиниң арқисидики кишиләрниң бири дәп гуман қилған.

Хәлқара кәчүрүм тәшкилатиниң тәтқиқатчиси вилям ний җүмә күни фирансийә агентлиқиға бәргән баянатида, “даириләр у очуқ хәтниң арқисидики гуманлиқ кишиләрни тәқиб қилиштин ваз кечиши, униңға четилип тутқун қилинған барлиқ кишиләрни қоюп бериши керәк” дегән.

Вилям ний йәнә, “өктичиләрниң аилә әзалирини җазалаш һәддидин ашқанлиқ вә қанунсиз тактика. У хитайниң қанун билән башқуруш тәшәббусини бимәниләштүриду” дәп тәкитлигән.

Хоңкоңда елан қилинған очуқ хәт дәрһал уйғур аптоном районлуқ парткомниң башқурушидики “вуҗйе” намлиқ тор бетидә көчүрүп елан қилинған. Бу әһвал наһайити зор ғулғула қозғиған иди.

Хәвәрләрдин мәлум болушичә, һазирға қәдәр 16 киши бу очуқ хәткә четилип тутқун қилинған. “вуҗйе” намлиқ бетиниң бир хадими фирансийә агентлиқиға, 4 хизмәтдишиниң из-дерәксиз ғайиб болғанлиқини билдүргән.