Хәлқара кәчүрүм тәшкилати: "тутулған уйғур хитайға қайтурулмаслиқи керәк!"

Мухбиримиз җәвлан
2021-09-22
Share

21-Сентәбир хәлқара кәчүрүм тәшкилатиниң тор бетидә берилгән мәлуматтин қариғанда, хитайниң тәлипи билән маракәштә тутулуп, 2 айдин бери қамақта туруватқан идрис һәсәнниң 22-сентәбирдә ечилмақчи болған соти 10-айниң 27-күнигә кечиктүрүлгән.

Идрис һәсәнниң аяли бузәйнур ханим хәлқара кәчүрүм тәшкилатиға қилған сөзидә өзиниң күчлүк әндишисини билдүрүп: "әгәр йолдишим хитайға қайтуруветилсә, мән уни мәңгү көрәлмәй қелишимдин әнсирәймән. Балилирим мәктәптә оқуватиду, уларға дадиси болмиса болмайду, йолдишимму күн санап туруватиду, балдуррақ қоюп берилсәм дәйду. Әгәр у қоюп берилмисә, һәммимиз үчүн чоң келишмәслик болиду," дегән.

Хәлқара кәчүрүм тәшклати маракәш һөкүмитидин идрис һәсәнни хитайға қайтуруп бәрмәслики керәкликини, болмиса униң тәқдириниң хәтәрлик болидиғанлиқини давамлиқ тәкитләп кәлгән. Мәзкур тәшкилатниң хәлқара кирзисларға инкас қайтуруш бөлүминиң башлиқи җони марийер мундақ дегән: "идрис һәсән йолуққан кирзис хитайниң уйғурларни һәр йәрдә контрол қилишқа урунуватқанлиқини ениқ көрситип бериду. Башқа дөләтләрни уйғурларни хитайға өткүзүп беришкә яки уларни қоғлап чиқиришқа қисташ уйғурларда еғир қорқунч, вәһимә пәйда қилмақта. Маракәшкә кәлсәк, әгәр идрис һәсәнни уйғурлар вә башқа аз санлиқ милләтләр кәк көләмдә тутулуп дәһшәтлик қийнашларға учраватқан хитайдәк бир дөләткә қайтурувәтсә, хәлқара қанунда бәлгиләнгән мәсулийитигә хилаплиқ қилған болиду".

Көзәткүчиләрниң билдүрүшичә, идрис һәсәнниң сотиниң бу қетим кечиктүрүлүши хитай билән хәлқара кишилик һоқуқ қоғдиғучилири арисидики бир мәйдан күч синишишниң йәнә давам қиливатқанлиқини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт