Америка 52 кишигә “магнетскй кишилик һоқуқ қануни” бойичә җаза тәдбири елан қилди

Бүгүн, йәни 21 декабир күни, америка дөләт ишлири министирлиқи хәлқарада 52 кишигә хәлқара “магнетскй кишилик һоқуқ қануни” бойичә җаза тәдбири қоюлғанлиқини елан қилди.

Дөләт ишлири министири рекс теллерсонниң имзаси билән елан қилинған баянатта ейтилишичә, америка дөләт ишлири министирлиқи вә америка малийә министирлиқи бирликтә дунядики кишилик һоқуқ дәпсәндичилики вә чириклик билән шуғулланған 52 кишини җазалайдиғанлиқини билдүргән.

Бирләшмә агентлиқниң хәвиридә ейтилишичә, бу 52 киши бермадики роһинга мусулманлирини бастурушқа йетәкчилик қилған берма генерали маңмаң со, җәнубий судан президентиға мәслиһәтчилик қилған бенҗамин болмел вә сабиқ гамбийә рәһбири яһя җаммә қатарлиқларни өз ичигә алидикән.

Дөләт ишлири министири рекс теллерсон баянатида мундақ дегән: “министирлиқимиз дуняда кишилик һоқуқни күчләндүрүш вә чирикликкә қарши туруш үчүн күрәш қилиду. Бизниң бүгүнки қараримиз америкиниң дуняда кишилик һоқуқни дәпсәндә қилған вә чириклик қилғанларға қарита бәлгилик усул вә күчлүк ақивәтләр арқилиқ җазаландурушни давам қилидиғанлиқини очуқ ипадә қилиду.”

Мәлум болушичә, бу америка һөкүмитиниң “хәлқара магнетский кишилик һоқуқ қануни” ға асасән тунҗи қетим йүргүзгән җаза тәдбири болуп һесаблинидикән.

“магнетскй қануни” әслидә 2012‏-йили русийәлик кишилик һоқуқ паалийәтчиси сергей магнетскйниң намида русийәгә қарита чиқирилған. Әмма 2016‏-йили бу қанунниң даириси кеңәйтилип, “хәлқара магнетскй кишилик һоқуқ қануни” ға өзгәртилгән иди. Қанунға асасән, америка өзиниң һоқуқи вә хизмәт имтиязидин пайдилинип бигунаһ пуқраларниң өлүшигә, тән җазасиға учришиға сәвәб болған кишиләрниң америкиға киришини чәкләш, уларниң америкидики мал-мүлүклирини мусадирә қилиш, әгәр америкиға кәлгән тәқдирдә қануний җазаға тартиш һоқуқиға игә икән.