A'ile judaliqining qurbanliri boluwatqan türkiyediki Uyghur sebiyliri zor diqqet qozghidi

Muxbirimiz eziz
2021.03.30

Xitay hökümitining Uyghur diyaridiki irqiy qirghinchiliqining eng chong ziyankeshlikige uchrawatqanlar ichide Uyghur sebiyliriningmu zor sanni teshkil qilidighanliqi CNN téléwiziyesining türkiyediki yitim chong boluwatqan Uyghur ösmürlirini ziyaret qilishi bilen téximu zor kishilerning diqqitini qozghidi.

Muxbirlar ziyaret qilghan Uyghur ösmürliri her xil yashta bolsimu, emma ularning qismetliri asasen oxshash. Hemmisiningla ata-aniliri her xil sewebler bilen xitay hökümitining lagir sistémisigha qamilip qalghan hemde pasportliri musadire qilinip, héchnege baralmas qilip qoyulghan. Bezilerning ata-aniliri éghir qamaqqa höküm qilin'ghan bolsa yene bezilerning ata-anilirining ölük-tirikimu namelum halda turmaqta iken. Ene shu yosunda ata-aniliridin kichikla yitim qélishqa mejburlan'ghan hemde uruq-tughqanliri bilen bolghan barliq alaqisi késip tashlan'ghan bu balilarning beziliri hetta ata-anisining simasinimu esliyelmes bolup qalghan. Ene shu xildiki balilarning biri on alte yashliq hesen bolup “Ata-anamni körmigili besh yil boldi. Eger ular bilen uchriship qalsam tonuyalmasliqim mumkin” dégen. Chünki uning dadisi besh yil ilgiri wetende qalghan bala-chaqisini élip kélishke yolgha chiqqanche ghayip bolghan. Istanbuldiki abdulla we muhemmed qatarliq on nechche yashliq ikki balimu töt yildin buyan héchqandaq uruq-tughqini bilen alaqiliship baqmighaniken.

Xewerde éytilishiche, istanbuldiki “Oqu Uyghur mektipi” de oquwatqan Uyghur sebiylirining hemmisila dégüdek mushu xil qismetni bashtin kechüriwatqan bolup, yene beziler alliqachan ata-anisini pütünley esliyelmes bolup qalghan. Mektep mes'uli hebibulla kuseni bu heqte muxbirlargha ehwal tonushturup “Ene shundaq bolghachqa biz bu mektepte balilarni Uyghurluq kimliki boyiche terbiyeleshke küch chiqiriwatimiz” dégen.

Halbuki xitay hökümiti hazirghiche Uyghurlarning yötkilish heqliri héchqandaq cheklimige uchrighini yoq, dep kéliwatqan bolup, istanbuldiki bu Uyghur yitimlirining qismiti xitay hökümitining izchil yalghan sözlewatqanliqini yene bir qétim ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.