Amérika kéngesh palata ezaliri amérika hökümitidin Uyghur rayonida ishlepchiqirilghan litiy mehsulatlirini tekshürüshni telep qildi

Amérika kéngesh palatasining bir qisim ezaliri amérika weten bixeterliki ministirliqining ministiri alixandiro mayorkas (Alejandro N. Mayorkas) Qa xet yézip, amérikaning Uyghur rayonida ishlepchiqirilghan litiy mehsulatlirigha tayinip qélishining xetirini agahlandurghan. Marku rubiyo (Marco Rubio), joni érnist (Joni K. Ernst), rik skot (Rick Scott) qatarliq kéngesh palata ezaliri 10-awghust alixandiro mayorkasqa yollighan xétide, xitayning eng chong éléktirliq aptomobil batariyesi ishlepchiqirish karxanisi bolghan “Ningdé zaman téxnologiye cheklik shirkiti” (CATL) ning Uyghur aptonom rayonidiki emgek küchlirini yötkesh programmisigha chétishliq litiy mehsulatlirini menbe'e qilidighanliqi tekitlen'gen.

Amérika kéngesh palata ezalirining xétide agahlandurushiche, amérikaning ford aptomobil shirkitining “Ningdé zaman téxnologiye shirkiti” bilen shérikliship ortaq bataréye ishlepchiqirish karxanisi qurushi emeliyette amérikaning qullar emgikide bulghan'ghan mehsulatlarni import qilishni cheklesh herikitige qilin'ghan buzghunchiliq hésablinidiken.

Xette mundaq déyilgen: “Bizning chüshinishimizche, ningdé zaman téxnologiye shirkitining litiyliq batariyeliri shinjang Uyghur aptonom rayonidiki Uyghur we bashqa musulmanlarni asas qilghan étnik milletlerning mejburi emgikide ishlepchiqirilghan yaki amérika qanunigha asaslan'ghandimu mejburi emgekte ishlepchiqirilghan, dep hésablanmaqta.”

Palata ezalirining qeyt qilishiche, “Ningdé zaman téxnologiye cheklik shirkiti” ning Uyghur rayonidiki “Shinjang jisün litiy shirkiti” bilen biwasite teminlesh-teminlinish munasiwiti bar bolup, “Shinjang jisün litiy shirkiti” Uyghur rayonida yürgüzülüp kelgen xitayning dölet hamiyliqidiki emgek küchlirini yötkesh programmisigha chétishliq iken. Ford shirkiti bu yilning bashlirida xitayning “Ningdé zaman téxnologiye cheklik shirkiti” bilen 3 milyard 500 milyon dollar meblegh sélip, michigan shtatida ortaq éléktirliq aptomobil bataréye ishlepchiqirish zawuti quridighanliqini élan qilghan.

Ford shirkiti “Néngdé zaman” bilen bolghan ortaq hemkarliq türini élan qilip uzun ötmey, Uyghur aptonom rayonluq partkom sékrétari ma shingrüy, dunyaning eng chong litiy ishlepchiqirish baziliridin biri bolghan charqiliq nahiyesining lopnur köli sana'et baghchisi we yéngi matériyallar ishlepchiqirish rayonida tekshürüshte bolup, litiy ishlepchiqirishini téximu kéngeytish we yuqiri süpetlik tereqqiyatini téximu algha sürüshni tekitligen idi. Amérika kéngesh palata ezalirining éytishiche, “Ningdé zaman shirkiti” ning litiy teminlesh zenjiri éniqsiz bolup, uning “Shinjang jisün litiy shirkiti” bilen bolghan munasiwiti bu shirketning amérikagha éksport qilghan mehsulatliri tutup qélinmighan teqdirdimu, jiddiy tekshürüshni telep qilmaqta iken.