Хәлқара тәшкилатлар 23 - април маралбеши вәқәси һәққидә мустәқил тәкшүрүш елип беришни тәләп қилди

Сәйшәнбә күни мәркизи брюсселдики вакаләтсиз милләтләр тәшкилати мәхсус баянат елан қилип, 23 - апрел маралбеши вәқәси үстидин мустәқил тәкшүрүп елип беришни тәләп қилди.

Тәшкилатниң баянатида, хитай һөкүмитиниң бу хил вәқәләрни чақмақ тезликидә “террорлуқ вәқәси” дегән қалпақни кийгүзүш арқилиқ бир тәрәп қиливатқанлиқи, вәқә йүз бәргән районларни қамал астиға елип һечқандақ мухбирниң яки мустәқил тәкшүргүчиниң киришигә йол қоймайдиғанлиқи әскәртилгән.

Вакаләтсиз милләтләр тәшкилати өзлириниң маралбеши вәқәсидин кейин қолға елинғанларниң тәқдиридин әндишә қиливатқанлиқини билдүргән. Улар, бирләшкән дөләтләр тәшкилатиниң дәрһал вәқә үстидә тәкшүрүш елип баридиған мәхсус гуруппа қуруши керәкликини ейтқан вә яврупа парламентини бу һәқтә б д т ға чақириқ қилишқа үндигән.

Хитай һөкүмитиниң 23 - априлдин буян вәқә һәққидә охшимайдиған баянларни бериши вәқәниң әсли маһийити һәққидики гуманларни техиму күчәйтивәткән иди. Чаршәнбә күни дуня уйғур қурултийи мәхсус язма баянат елан қилип, хитай һөкүмити вәқә һәққидә илгири сүрүватқан пакитларниң йәрликтин игиләнгән учурлар билән чәк басмайдиғанлиқини, шуңа чоқум хитай һөкүмитигә мустәқил тәкшүрүшкә йол қоюш һәққидә бесим ишлитилиши керәкликини билдүрди. Дуня уйғур қурултийи йәнә хәлқара җамаәтни маралбеши вәқәсидә қолға елинғанларниң ақивитини сүрүштә қилишқа чақирди.