Санаәтләшкән 7 дөләт гуруһи уйғур мәҗбурий әмгикигә қарши турушқа чақирилди

Мухбиримиз әркин
2022.06.24
Share on WhatsApp
Share on WhatsApp

Уйғур мәҗбурий әмгикигә қарши бир хәлқаралиқ бирләшмә 23-июн санаәтләшкән 7 дөләт гуруһиниң рәһбәрлиригә очуқ хәт елан қилип, уларни уйғур мәҗбурий әмгикигә қарши турушқа чақирған. 40 Тин артуқ дөләттики 400 дин артуқ тәшкилаттин тәшкил тапқан мәзкур хәлқаралиқ бирләшмә, 26-июн күни германийәдә башлинидиған 7 дөләт гуруһиниң рәһбәрлиригә чақириқ қилған. Америка ташқи ишлар министирлиқиниң билдүрүшичә, президент байденму қатнишидиған бу йиғинниң музакирә күнтәртипи йәршари һава килимати, украина уруши, дуня тәминләш зәнҗири, ашлиқ кризиси қатарлиқ мәсилиләрни ‍өз ичигә алидикән.

“уйғур мәҗбурий әмгикигә хатимә бериш бирләшмиси” очуқ хетидә, 7 дөләт гуруһи рәһбәрлирини уйғур районидики уйғур вә башқа түркий һәм мусулман хәлқлиригә қаритилған мәҗбурий әмгәк вә еғир кишилик һоқуқ дәпсәндичиликлиригә қарши турушта конкрет тәдбирләрни қоллинишқа чақирған. Очуқ хәттә мундақ дейилгән: “биз силәрниң импорт контрол механизмлирини йолға қоюп вә пухта иҗра қилиш арқилиқ уйғур мәҗбурий әмгикидә булғанған малларниң базарлириңларға кәлкүндәк еқип киришини тосуп, вәдәңларға һәқиқий рәвиштә әмәл қилишиңларни чақиримиз”.

Очуқ хәттә хәлқара тәминләш зәнҗириниң кийим-кечәк, тоқумичилиқ, химийә, доригәрлик, аптомобил вә йеза игилик қатарлиқ нурғун саһәлиридә уйғур мәҗбурий әмгикиниң ишлитилидиғанлиқиға даир ишәнчлик дәлилләр барлиқи билдүрүлгән.

Очуқ хәттә йәнә “һөкүмәтләрниң бу мәһсулатларниң өз базарлириға киришини тосуши, мәҗбурий әмгәк мәһсулатлирини нишан қилған импорт контрол тәдбирлириниң үнүмлүк болуши үчүн дуняви һәмкарлиқниң интайин муһим” икәнлики тәкитләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.