Муһаҗирәттики уйғур сиясий паалийәтчилириниң төлигән бәдәллири диққәт қозғимақта

Мухбиримиз әзиз
2021-06-10
Share

Йеқинқи мәзгилләрдин буян хитайниң уйғур дияридики сиясий бастурушниң бивастә зиянкәшлигә учраватқан уруқ-туғқанлири вә башқа йеқинлириниң күлпәтлири үчүн чәт әлләрдики көплигән уйғурлар көкрәк керип оттуриға чиққан иди. Тутқун қилинған аилә әзалири үчүн гуваһлиқ бәргән бу уйғурлар гәрчә чәт әлләрдә яшаватқан болсиму, әмма уларниң хитай һөкүмитиниң "интиқам елиши" дин халас болалмиғанлиқи, йеқиндин буян йеңиваштин диққәт қозғашқа башлиди. 

"кишилик һоқуқни көзитиш тәшкилати" хитай бөлүминиң директори софи ричардсон ханимниң 9-июн күни өзлириниң тор бетидә елан қилинған бу һәқтики мақалисидә мушу мәсилә йәнә бир қетим әслитип өтүлди. Униң ейтишичә, зор бир түркүм пидакар уйғур муһаҗирлириниң юртлиридики уруқ-туғқанлири билән болған әң әқәллий алақилишиш һәқлири тартивелинған болса, йәнә бир түркүм уйғур давагәрлириниң уруқ-туғқанлири түрлүк баһаниләр билән еғир қамақ җазалириға һөкүм қилинмақта икән.

Софи ричардсон ханим буниңға мисал қатарида долқун әйса, рошән аббас, гүлчеһрә хоҗа қатарлиқларни мисал алиду. Болупму дуня уйғур қурултийиниң рәиси долқун әйсаниң лагерда өлүп кәткән аниси айхан мәмәт вә 86 йешида вапат болған дадиси әйса мәмәтниң өлүм хәвирини нәччә йиллардин кейин аңлиғанлиқи, иниси хуштарниң аталмиш "терорлуқ" җинайити билән әйиблинип муддәтсиз қамаққа һөкүм қилинғанлиқи, вашингтон шәһридики уйғур һәркити тәшкилатиниң рәиси рошән аббасниң пенсийәгә чиққан һәдиси гүлшән аббасниң 20 йиллиқ қамаққа һөкүм қилинғанлиқини тилға алиду. У бу "роһий җаза" ларниң әмәлийәттә уларниң уйғур даваси үчүн төлигән еғир бәдәллириниң бир қисими икәнликиини көрситип өтиду.

Софи ричардсон хитай һөкүмитиниң мушу хилдики "йирақтин қисас елиш" һәркити тоғрисида радийомиз зияритини қобул қилғанда, "бу әмәлийәттә хитай һөкүмитиниң қанун бойичә идарә қилинмайдиған бир һакимийәт икәнликиниң әң рошән испати" дәп көрсәткән иди. 

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт